開主選單

 基督教東山堂粵拼gei1 duk1 gaau3 dung1 saan1 tong4中國廣東廣州嘅一間基督教堂,喺1870年起好,位置最初喺越秀區五仙觀西邊附近,1909年搬到而家東山洋樓範圍嘅寺貝通津9號。佢係全廣州地區規模最大嘅教堂。

東山浸信會舊址
廣州市文物保護單位
DungSaanTong.jpg
日頭嘅東山堂
喺邊 廣州市越秀區
座標 23°7′31.9″N 113°17′31.34″E / 23.125528°N 113.2920389°E / 23.125528; 113.2920389座標: 23°7′31.9″N 113°17′31.34″E / 23.125528°N 113.2920389°E / 23.125528; 113.2920389
近現代緊要史跡同代表性建築
時代 大清
5-11
登錄 1999年
地圖

 
晚黑嘅東山堂

大清道光十六年(1836年),美國波士頓浸信會派咗宣教士嚟廣州起教堂傳福音,但嗰時清政府搞閉關自守而唔畀入境,令教會一度喺澳門逗留。鴉片戰爭後,由於清政府被逼簽不平等條約,從而宣教士受到條約保護而順利入到廣州,雖然喺東沙角南關等地租咗民房開教堂傳福音,但成日俾當地居民揼爛,連珠江上邊傳福音嘅紫洞教船都射沉埋。雖然同治九年(1870年),美國基督教南差會五仙觀西邊買咗地搞福音堂,但1908年由於太多信徒拜基督教,加上五仙觀附近係繁華地段兼冇位擴建,結果將舊址賣咗出去而搬到東山寺貝通津一帶,重改名做東山堂。而教堂喺1909年5月2號起好嗮兼成立東山浸信會。

東山浸信會成立之後,聚會人數又多咗好多,連東山地區嘅幾間教會學校師生都成日嚟搞禮拜聚會。後嚟教堂喺1923年7月改成由石屎整嘅主堂。1927年4月16號起好主堂之後改名做東山浸信會堂,重搞咗隆重嘅獻堂典禮。1938年10月,由於日軍霸咗廣州,連東山浸信會堂都唔例外,直到1945年8月15號日軍投降之後收返。1946年,美南浸信會將冚唪唥嘅教產畀嗮東山堂浸信會而成為中國人嘅教會產業。

1949年5月2號,嗰日啱好教堂成立40周年,班信徒開始有幾慳用得幾慳,凈用咗4個月時間厝返嚟啲錢,直接搞咗間牧師樓出嚟。1950年9月23號,中國大陸40位華人教會領袖發佈咗三自革新宣言而俾信徒猛咁聯名支持,主張喺政治、經­濟同教務上完全捹甩外國教會嘅控制而走返獨立自主同自辦教會道路。

由於基督教信徒喺1960年代初逐漸减少,有時凈得三四十人嚟參拜。結果1960~1966年間先後將基督教各宗派內有聚會活動嘅53間教堂,合併成9間唔分宗派嘅禮拜堂。而東山浸信會堂、東石浸信會堂、中華基督教廣東協­會光東堂、播道會東川堂、賴神浸信會堂同基督會原­道堂等6間教堂合併咗,重改返舊時嗌嘅東山堂。1966年,由於文化大革命爆發,受到破四舊浪潮影響,教會唔單止逼住停嗮宗教活動,連主堂、副堂南邊、鐘樓客廳同牧師樓各變成東山區人民會場、整車廠、廚房托兒所。直到1979年嘅十一屆三中全會落實宗教政策之後先至收返教堂用地。嗰年9月30號正式恢復返參拜。

雖然教堂喺1986年將主日學堂同副堂房屋攞咗嚟搞廣東協和神學院,但學校搬走之後一直冇再返嚟東山附近[註 1]。1987年,廣州市基督教兩會嚟過本堂附近辦公[2]

由於教堂損壞嚴重,所以政府從1990年代開始,將教堂搞咗好多次修繕,甚至喺2003~2007年間搞咗次大修繕。1999年7月重將教堂列為廣州市文物[2]

風格

教堂喺1908年搬到東山寺貝通津一帶之後,原先起成一層樓帶葵棚結構嘅禮拜堂。後嚟俾大風吹冧咗兩次,直到1923年擴建時拋棄咗原有嘅葵棚結構,改成兩層樓嘅美式石屎建築。改建之後,佔地有3850m²,主體建築2276.18m²[2],入面有禮拜堂、副堂、主日学堂等建築,主堂嘅圓形大廳有1300個座位。從1990年代開始,經過長時間嘅修補同改造之後,大堂出面搞咗綠化、重整埋魚池、花園、花廊、草坪、休息亭等,而主堂內外多咗中央空調同多功能設備係2003~2007年嘅大整修時期加上去嘅。主堂大門出面隔籬重有個十字架,寫住「耶穌愛你」四個字嘅裝飾。

註同攷

  1. 廣東協和神學院喺1994年搬到沙面聖公會主教樓繼續辦學,2001年11月30號又搬咗次,去到而家白雲區東平北路嘅文盛莊一帶[1]
  1. 学院概况 互聯網檔案館歸檔,歸檔日期2016年4月13號,. 廣東協和神學院
  2. 2.0 2.1 2.2 基督教东山堂简介 广州市民族宗教事务局

連出去