柯伊伯帶

柯伊伯帶（英文：Kuiper belt，又叫倫納德-柯伊伯帶、凱伯帶，或者叫庫柏帶）係太陽系喺海王星軌道（距離太陽大約30天文單位）外面嘅黃道面附近、天體密集嘅中空圓盤狀區域。柯伊伯帶嘅假說最初係由愛爾蘭裔天文學家倫納德提出，並響十年後再由另一位天文學家柯伊伯再次獨立提出。

藝術想象圖：柯伊伯帶同假說存在於更遠嘅歐特星雲

柯伊伯帶嘅位置處於距離太陽40至50天文單位低傾角嘅軌道上。以前嗰度一直被認為係咩都冇，係太陽系嘅盡頭。但係其實呢度好熱鬧，有好多直徑由幾公里到成千公里嘅冰封物體。柯伊伯帶上嘅呢啲物體係點成形嘅呢？如果按照行星形成嘅吸積理論來解釋，咁就係佢哋響繞日運動嘅過程中撞倒，互相吸引，最後黏附成一個個大小不一嘅天體，變成而家個樣。

柯伊伯帶係現時人類所知嘅太陽系嘅邊界，係太陽系大多數彗星嘅來源地。自從冥王星被發現，就有天文學家認為冥王星應該排除響太陽系嘅行星之外，而由於冥王星嘅大細同柯伊伯帶入便嘅小行星大細相近，20世紀末更有主張歸入柯伊伯帶小行星嘅行列當中；而冥王星嘅衛星就應被當係佢嘅伴星。響2006年8月嘅國際天文學聯合會已經將冥王星、穀神星同新發現嘅鬩神星一齊歸入新分類矮行星。