梁詠詩

梁詠詩（英文：Jenny Leung，1984年—），係香港泛民主派（立場挨近香港本土派）社運人士，東區筲箕灣選區議員、筲箕灣民生關注組成員，2015年開始投身東區筲箕灣選區地區工作。

梁詠詩喺香港中文大學中文系畢業，之後做中學教師。梁詠詩喺2015年區議會選舉首次參選，被外界睇成其中一位「傘兵」，只係以15票差距輪咗畀接棒嘅民建聯林心廉（勞鍱珍嘅徒弟），但佢一直無放棄地區工作，喺四年後嘅區議會選舉再度挑戰，結果佢亦都成功報番四年前落選嘅一箭之仇，以1312票之差打低林心廉。

2021年9月10號，佢同另外六位泛民主派東區區議員仇栩欣、周卓奇、蘇逸恒、韋少力、陳榮泰、黎梓欣參與2021年香港區議員宣誓，結果佢同仇栩欣、周卓奇宣誓有效，得以繼續做區議員。