構造成本模型

構造成本模型（英文：Constructive Cost Model，COCOMO）係廿一世紀初軟件工程上最常用嘅成本估計法之一，建基於對前人做軟件開發得到嘅數據嘅迴歸分析。

原理

内文：迴歸分析同軟件工程

迴歸分析（regression analysis）係一種統計學技術，喺最簡單嗰種情況下，攞若干個自變數 $x_{1},x_{2},x_{3}...$ 同一個應變數 $y$，而

$y=\beta _{0}+\beta _{1}x_{1}+\beta _{2}x_{2}+\beta _{3}x_{3}+...+\varepsilon _{i},\quad i=1,\dots ,n.\!$

迴歸分析做嘅就係攞一柞過往嘅數據，估算出啲參數－柞 $\beta$－嘅數值，最後得出一個迴歸模型。於是第時研究者就可以攞住個迴歸模型（知道咗柞 $\beta$ 嘅值），靠觀察啲 $x_{1},x_{2},x_{3}...$ 嘅數值嚟計 $y$ 嘅數值大致上會係幾多。喺 1970 年代尾，有美國嘅軟件工程研究者搵咗一大柞軟件工程師嘅開發項目嘅數據返嚟，每個項目做一個個案做迴歸分析，個項目啲特徵（例如係個項目嘅複雜度噉）做 $x_{1},x_{2},x_{3}...$，而「個項目要用嘅資源」做 $y$，建立咗迴歸模型，發現用噉嘅迴歸模型能夠大致噉估計一個軟件開發項目嘅成本－由呢個過程形成嘅就係 COCOMO 成本估計法。

計法

最基本嗰條 COCOMO 式係噉嘅：

$E=a_{i}({\text{KLoC}})^{b_{i}}({\text{EAF}})$，當中

• $E$ 係「要用幾多精力」；
• ${\text{KLoC}}$ 係估計個軟件項目有幾多千行碼（睇大細估計）；
• ${\text{EAF}}$ 係一個佢哋有特定方法評估嘅因子，數值取決於隻軟件嘅複雜度、記憶體限制同埋工程師嘅能力等多個因素；
• $a_{i},b_{i}$ 係參數，數值係由班研究者憑啲數據估算出嚟嘅，數值會視乎軟件項目嘅種類而有異，最基本嘅可以係 $a_{i}=3.2,b_{i}=1.05$。然後

$D=2.5E^{c_{i}}$

• $D$ 係成場開發要花嘅時間（以月計）；
• $c_{i}$ 係參數，數值又係會視軟件項目嘅種類而有異，最基本嘅可以係 $c_{i}=0.38$。

睇埋

• 軟件大細估計