殷觀

殷觀（粵拼：jan1 gun1；？—？），字孔休（hung2 jau1），荊州人，係東漢末年劉備嘅謀士。

殷觀
蜀漢 官員
遞啲名
字	孔休

根據楊戲嘅《季漢輔臣贊》，話「孔休、文祥……楚之蘭芳」，知佢係荊州人，但具體嘅郡縣唔知。另外喺《三國志・蜀書》嘅《先主傳》度有殷純，但未知佢同殷觀係咪親屬。

事蹟

赤壁之戰後，劉備做埋荊州牧，擁有荊州大片屬地，孫權爲咗同佢交好，將自己個妹嫁畀佢。之後孫權派使節話，想同劉備一齊攞低蜀地，當時劉備有啲心喐喐，因爲佢諗住吳地同蜀地之間隔住個荊州，東吳點都檻唔過荊州來控制蜀地，噉樣劉備就可以將蜀地據爲己有。

當時殷觀做荊州主簿，佢就勸劉備咪噉做，話：「若果我哋爲東吳做開路前鋒，向前未必攻克得掂蜀地，向後可能畀東吳乘虛而入，到時就大勢已去喇。而家可以表面話贊同佢討伐蜀地，不過推託話自己先啱佔據啲郡，未可以興兵妄動，東吳一定唔敢越過我哋境內來自己攞低蜀地。按噉嘅進退之計，就可以坐收吳、蜀兩地之利。」劉備聽咗殷觀話。孫權之後停咗奪蜀計劃，於是劉備升殷觀嘅官做別駕從事。

參攷資料

• 陳壽（著）；裴松之（注）. 〈卷三十二 - 蜀書：先主傳〉. 《《三國志》》. 權遣使云欲共取蜀，或以為宜報聽許，吳終不能越荊有蜀，蜀地可為己有。荊州主簿殷觀進曰：「若為吳先驅，進未能克蜀，退為吳所乘，即事去矣。今但可然贊其伐蜀，而自說新據諸郡，未可興動，吳必不敢越我而獨取蜀。如此進退之計，可以收吳、蜀之利。」先主從之，權果輟計。遷觀為別駕從事。
• 陳壽（著）；裴松之（注）. 〈卷四十五 - 蜀書：鄧張宗楊傳〉. 《《三國志》》. 孔休文祥，或才或臧，播播述志，楚之蘭芳。──贊馬季常、衛文經、韓士元、張處仁、殷孔休、習文祥……孔休名觀，為荊州主簿別駕從事，見先主傳。失其郡縣。