永新村

永新村（粵拼：wing5 san1 cyun1）係中國村名，可以係：

• 廣東汕頭澄海嘅村，請睇《蓮上鎮》

  村民姓余，叫南洋余氏。明萬曆三年（1575年）起大宗祠，卜過卦，當時按卦象起名做永平（wing5 ping4）。1950年中共佔領廣東後，話要「廢舊立新」，就改咗人村名叫永新，話「政治面貌同思想永遠新」噉解。

  條村開喺元朝末年，按《永新史譜》：南洋鄉余氏嘅第一世開基祖叫余氏仲偉公，官至翰林院大學士，原本住响潮州城，佢生咗七個仔，大仔東埜公搬去外砂鄉，二仔高節公住返郡城嘅舊屋，三仔東渠公、四仔東軒公、五仔東山公、六仔東松公、七仔東溪公係南洋余氏第二世，嗰時元末大亂，啲人驚住會屠城，就避來呢處，當時係南洋鄉嘅中社，除咗余氏，仲有其他姓嘅家族。

  明萬曆三年開創做永平鄉。本屬饒平縣蘇灣都，明嘉靖四十二年（1563年）改屬澄海縣蘇灣都。1921年屬蘇南區；1950年改叫永新鄉，1953年屬第二區，1958年9月設生產大隊，屬蘇南公社，1968年10月改名做衛東（wai6 dung1）大隊，屬東方紅公社，1972年改屬蓮上公社，1975年11月恢復個名叫永新。1984年大隊改成鄉政府，屬蓮上區，1986年設居委會，屬蓮上鎮，1990年改成管理區，1998年改爲村委會。

• 廣西桂林永福嘅村，請睇《永安鄉》

  地名中，「永」指永安鄉，「新」指新興鄉。

  原本當地分屬兩個唔同嘅鄉。1947年分屬新興鄉嘅陽境村、永安鄉嘅石牌村，都係屬百壽縣。1949年分屬新興鄉嘅雄獅村、興仁鄉嘅陽境村；1950年4月屬縣嘅古底區，當年12月改屬縣嘅第三區；1952年上半年，雄獅同陽境合成永新鄉，當年8月百壽縣併入永福縣，屬永福縣嘅第八區；1955年9月屬古底區，1956年屬和平區；1957年12月屬鳳凰鄉。1958年9月永新劈成石牌、獨州兩個大隊，都屬和平公社；1961年5月，石牌又分出個回龍大隊，回龍屬和平公社，石牌畀咗鳳凰公社。1962年7月石牌、獨州、陽境、回龍四支大隊復合返永新公社，屬和平區，後來改做鄉。1968年8月，永新鄉又再劈成永新、獨州兩個大隊，屬和平公社。1982年改屬永安公社，1984年7月改成永安鄉嘅永新村。

• 吉林省吉林市蛟河嘅村，請睇《拉法街道》

  村名喺中共建制後起嘅，話啲人過咗新生活而且好鍾意，「永遠熱愛新生活」噉解。

  當地原名叫牌樓（paai4 lau4），出處嘅講法有兩個：一係話舊時有間木屋佢個屋檐好大，所以叫佢做牌樓；二係話舊時有個楊氏寡婆病終，鄉里幫佢起咗個牌坊，就叫做牌樓。

  1910年開始有住戶，1936年開村，歸滿洲國嘅新站保，1945年屬拉法區嘅拉法村管，1954年改名做永新，撤區後屬拉法鄉。1959年屬拉法公社嘅北大管理區，1962年分出咗永新大隊，1983年改成村委會。

• 黑龍江雞西雞東嘅村，請睇《永安鎮》

  1931年時叫鍋盔前（wo1 kwai1 cin4），滿洲國時叫霞城（haa4 sing4），土改後改叫新政（san1 zing3，包括而家嘅永新、永政、永生三條村），1965年先劃出。「永」指佢所屬嘅永安，「新」指原先嘅新政村。

• 上海浦東嘅村，請睇《高東鎮》

  原名叫共新（gung6 san1），喺1981年改成現時名。佢原本屬楊園鎮，2000年時楊園併入高東，就跟住歸高東鎮管。

• 江蘇蘇州崑山嘅村，請睇《澱山湖鎮》

  佢由原先四支大隊合併而成，分別係：永義、永安、永生、永益。「永」指原先嘅四支大隊，「新」指佢係新政區。

• 四川眉山東坡區嘅村，請睇《永壽鎮》

  「永」指佢所屬嘅永壽，「新」指佢係新政區。佢係2007年時由永興同永東合併而成。

• 湖北荊州公安嘅村，請睇《孟家溪鎮》

  當地位於松東河東岸，發洪時呢度會水浸，於是啲人起咗河堤，期望條堤永遠存在、永遠新淨，就起呢個地名來祈禱。

出面網頁

• 中國國家地名信息庫