港澳個人遊計劃，又叫做港澳自由行，一般簡稱做自由行，係一個容許中國大陸居民以個人旅遊嘅方式前往香港同澳門兩地旅遊嘅計劃。一般情況下，只要係計劃範圍內嘅城市，就可以經過簡單嘅簽証手續去港澳地區，最長可以留一個禮拜。其中，十一黃金周、五一黃金周同埋春節黃金周三個中國大陸主要長假期更加係港澳個人遊嘅出入境高峰期。港澳兩地都需要採取特別措施去疏導大量嘅出入境旅客。
