系列位置實驗
系列位置實驗（粵拼：hai6 lit6 wai6 zi3 sat6 jim6；英文：serial-position experiment）係研究記憶嗰陣常用嘅一個認知實驗[1]，講到人特別容易記得最先出現嘅嘢同埋最後出現嘅嘢。
概論 編輯
内文：記憶
呢個實驗嘅做法如下：研究者會俾受試者睇一系列喺時間上先後分別噉出現嘅訊息（例如係一柞先後出現嘅粵語字詞）；當一個受試者睇完最後嗰條訊息之後，研究者就問吓佢記唔記得某一個喺實驗當中出現過嘅訊息（例：「記唔記得第三個出現嘅字係乜」），而呢個實驗嘅關鍵變數就係「受試者會記得佢嘅機率」－攞是但一個訊息，事後能夠準確噉記得佢嘅受試者嘅數量比率就係「受試者會記得佢嘅機率」，跟住研究者就可以做統計分析，睇吓「受試者會記得佢嘅機率」會受乜因素影響[2]。
舉個例說明，系列位置實驗結果顯示，當人接收一系列喺時間上先後出現嘅訊息嗰陣，佢哋零舍會記得
- 最先收到嘅訊息（首因效應；primacy effect）同埋
- 最尾收到嘅訊息（近因效應；recency effect）－例如如果家吓有一個讀者就噉由頭睇呢篇文睇到落尾，佢最有可能會記得嘅係第一段嘅內容同最後嗰段嘅內容－即係話「受試者會記得佢嘅機率」會受個訊息嘅相對出現時間影響[2]。