美國選舉人團

美國選舉人團（英文：Electoral College），又叫做美國選舉人、美國選舉團、選舉人制度或者選舉人票，係美國總統選舉嘅方式，係一種間接選舉。呢個制度主要係用嚟選出美國總統同副總統嘅。根據《美國憲法》同《美國憲法修正案》，美國每個州嘅公民會先揀出嗰個州嘅選舉人，之後選舉人就會代表嗰個州投票，所以美國總統並唔係市民直接選出嚟嘅。唔用直接選舉嘅原因係因為美國係聯邦制國家，制憲會議嘅元老考慮到各州有自治性，所以用選舉人團嚟保障各州嘅權益。

而家美國總共有538個選舉人團席位，即係美國國會議員嘅數目加埋華盛頓特區嘅三個席位。