北白川宮
(由聖護院宮跳轉過嚟)
提示：呢篇文講嘅唔係護聖院宮。北白川宮（日文：北白川宮／きたしらかわのみや Kitashirakawa-no-miya）係日本舊時一個宮家，由邦家親王第十三仔智成親王響1870年創立，花名「悲劇宮家」，前身係聖護院宮。1947年響駐日盟軍總司令指示底下，北白川宮最後一任當主道久王皇籍脫離，降為平民。現時北白川宮已經絕家。
歷史 編輯
北白川宮前身係聖護院宮，由邦家親王二仔嘉言親王響1868年創立，但同年年尾嘉言就過身，所以由智成親王接任。1870年，智成將聖護院宮改名叫北白川宮。但係響1872年，智成親王早死，終年17歲，之後根據佢嘅遺言，將當主一位傳咗畀大佬、邦家親王第九個仔能久親王。
能久親王長年出國打仗。1894年，能久奉上司命令參加甲午戰爭，負責留守台灣，任職台灣軍指揮。點知能久1895年響台灣戰死（戰場上因病而死），終年48歲，由當主一位就三仔成久王接任。但係成久都唔長命，1923年同鳩彥王響巴黎郊區撞車，成久傷重死亡，終年35歲。
成久死後由大仔永久王接任當主一位。1940年，永久王參加中日戰爭，點知佢竟然響演習嘅時候軍機失事，雖然佢已經緊急降落，但係最終都係死咗，終年31歲。之後由當時只有三歲嘅獨仔道久王接任當主一位。
1947年響駐日盟軍總司令指示底下，道久王皇籍脫離，降為平民。2018年，道久王過身，北白川宮因為冇男性後裔而絕家。
由於北白川宮歷任當主都好黑仔（智成一早病死、能久響台灣戰死、成久響巴黎撞車而死、永久軍機失事而死），所以畀人叫做「悲劇宮家」。
歷任當主 編輯
聖護院宮 編輯
- 第一任（同時係末任）：嘉言親王
北白川宮 編輯
- 第一任：智成親王
- 第二任：能久親王
- 第三任：成久王
- 第四任：永久王
- 第五任（末代）：道久王
北白川家 編輯
即北白川宮皇籍脫離之後另起嘅家，但係呢個時候北白川家已經唔再係皇室成員。
- 第一任（同時係末任）：北白川道久
分支 編輯
- 小松侯爵家
- 二荒伯爵家
- 上野伯爵家