菅義偉

日本第99任內閣總理大臣

菅義偉粵拼gaan1 ji6 wai5菅 義偉すが よしひで ?1948年12月6號—)係日本政治人,現任內閣總理大臣自由民主黨總裁、內閣官房長官、北朝鮮綁架問題擔當大臣,做過總務大臣同郵政民營化擔當大臣。

菅義偉
Yoshihide Suga PM (cropped).jpg
Flag of Japan.svg 日本內閣總理大臣
前任安倍晉三
Flag of Japan.svg 日本自由民主黨總裁
前任安倍晉三
Flag of Japan.svg 日本內閣官房長官
前任藤村修
個人資料
出世 (1948-12-06) 1948年12月6號(72歲)
Flag of Japan.svg 日本秋田縣雄勝郡
配偶菅真理子
父母菅和三郎(老豆)
母校法政大學
菅義偉響2019年宣佈新年號令和

生平

菅義偉喺1948年出世,屋企係出身秋田縣嘅農家。喺佢高中畢業之後,菅義偉覺得自己冇可能考到同家姐一樣咁好嘅學校,於是決定去東京打工。佢最初喺紙箱工廠打工,但係佢好快就發覺呢種生活同喺鄉下嘅差唔多,於是做咗一陣就冇再做落去。後嚟佢每日返兩份工,朝早響築地市場度做,夜晚又喺新宿嘅餐廳打工[1],如是者做咗兩年嘢之後,菅義偉儲咗啲錢,考入咗法政大學法學部政治學系半工讀,揀入法政大學嘅原因係因為呢度學費平過其他私立大學。到佢畢業之後,佢去咗建電設備度打工,但係佢個心都係想向政治方面發展。

到1975年,佢經法政大學嘅就業諮詢,識咗一樣係法政大學校友嘅前眾議院議長中村梅吉,中村嘅秘書再介紹佢去到眾議院議員小此木彥三郎,自此佢就成為小此木嘅秘書。

1987年,菅義偉第一次去選橫濱市議員,但最初唔被睇好,但係佢堅持逐家逐戶去「洗樓」拜訪,結果贏咗。由於佢喺做秘書嗰陣累積到唔少人脈,加上橫濱前市長高秀秀信任內,成日搵問佢有關任用人事上嘅意見,令佢畀人叫做「橫濱影子市長」。

1996年,菅義偉第一次參加國政選舉,喺自己嘅地頭神奈川縣第二區出選,最後贏咗。入到國會之後,菅義偉拜小此木嘅朋友梶山靜六為師(當時小此木已經過身),亦都跟梶山加入黨內派系平成研究會。[2]

1998年,平成研嘅會長小淵惠三想出嚟選自民黨總裁,但係同派系嘅梶山都想選,最後梶山退出平成研究會,菅義偉亦都跟住一齊退出。後來佢改為加入宏池會,喺2000年「加藤之亂」嗰陣,佢冇支持同派系嘅加藤紘一,喺呢件事之後,宏池會分裂成兩派,菅義偉就加入反加藤嘅堀內派。到2009年之後,菅義偉就冇再入其他派系。[3]

2006年,當時安倍晉三第一次任相,菅義偉亦都第一次入閣,擔任總務大臣,後來安倍只係做咗一年左右就因為健康理由辭職,菅義偉亦都冇得再做。

2012年,自民黨打低咗民主黨,重奪政權,安倍揀返菅義偉入閣做內閣官房長官,安倍同菅義偉喺政治上嘅關係好緊密,好多人形容菅義偉係安倍晉三喺政治上嘅老婆。而喺菅義偉做內閣官房長官嘅期間,從來未失過言,畀外界叫做「安定之菅氏」。[4]

2019年4月1號,嗰時係內閣官房長官嘅佢宣佈新年號係「令和」,之後佢就多咗個花名叫「令和大叔」。

2020年9月16號,佢接替安倍晉三,成為日本第99任內閣總理大臣,籌建新內閣。[5]佢亦都係第一個以無派系身份當選自民黨總裁嘅人。

參攷

  1. Storm.mg (2020-09-11). "「令和大叔」能否殺出重圍?農家出身的菅義偉,如何走到日本政壇的「一人之下」-風傳媒". www.storm.mg (中文). 喺2020-11-01搵到.
  2. "令和的豐臣秀吉?菅義偉如何爬上來 | 假才子". 眾新聞 (中文). 喺2020-11-01搵到.
  3. "【日本新首相】菅義偉將拜相 農民變首相是如何煉成? - 香港經濟日報 - 即時新聞頻道 - 國際形勢 - 環球社會熱點". inews.hket.com. 喺2020-11-01搵到.
  4. 歐敬洛, 成依華 (2020-09-14). "菅義偉「木訥大叔」之逆襲 從農家之子邁向無派系首相勝在夠貼地". 香港01 (中文). 喺2020-11-01搵到.
  5. "【日本新首相】最長安倍內閣謝幕 菅義偉傍晚接捧". 香港經濟日報. 2020-09-16. 喺2020-09-16搵到.

出面網頁