蚜蟲

蚜蟲（粵拼：ngaa4 cung4；英文：aphid / greenfly；學名：Aphidoidea）係一個超科嘅昆蟲，包含咗超過 5,000 個物種。蚜蟲多數物種都係綠綠哋啡啡哋噉色，細隻，以吸樹汁或者食植物嘅各部位維生。

2017 年喺加拿大影到嘅一隻蚜蟲

2010 年影到嘅一幅相；隻豌豆蚜將佢好似針噉嘅口器插咗入樖植物度，吸樖植物嘅汁液，會對樖植物造成破壞。

2008 年影到嘅一幅相；相入面隻瓢蟲喺度咬住隻蚜蟲－蚜蟲破壞好多農作物，瓢蟲會消滅蚜蟲，所以畀好多農夫視為益蟲。

生態研究

天敵

睇埋：瓢蟲

蚜蟲喺食物鏈入面嘅位置好低，有好多天敵，當中最出名嘅要數瓢蟲（ladybird）：瓢蟲係食肉嘅，會食一啲細隻嘅食草昆蟲（例如蚜蟲），而因為蚜蟲好多都係會食同破壞農作物嘅害蟲－所以瓢蟲間接幫手保護咗好多農作物，對農夫有利。

數學模型

例：2004 年蚜蟲 ABM 研究

蚜蟲出嗮名係鍾意蛀食植物嘅害蟲，會對好多農作物造成破壞。因為噉，有唔少從事昆蟲同農業相關研究嘅科學家都有研究蚜蟲，想透過理解蚜蟲解答「點樣先可以有效防治蚜蟲」等嘅問題。

喺 2004 年，有一班研究地理嘅英格蘭科學家就針對稻麥蚜（學名：Rhopalosiphum padi；其中一種最常見嘅蚜蟲，英格蘭都唔少）做咗份研究，佢哋用物件導向程式語言 Java 寫咗個程式，啲虛擬碼大致如下：

 設 $n$ 件物件，每件物件表示一隻蚜蟲，每隻蟲有以下呢啲數值（1）
   3D 嘅位置值（position）、
   年紀值（age），數值係 0.00-2.00，當中 1.00 算係成年、
   佢過往嘅行為紀錄、
   佢獨有嘅 ID 值，方便部電腦監察住邊隻蟲打邊隻
 設 $t$（時間）= 0；（2）
 設定風向同氣溫等嘅環境變數；
 While $t$ 未到某個值，（3 同 4）
   將風向等嘅環境變數設做數據庫紀錄嘅數值；（班研究者事先問有關單位攞咗數據。）
   Foreach 物件
     age 數值升；
     if age >= 2.00
       隻蟲就死；
     隻蟲有若干機率會死； # 模擬「一隻蚜蟲就算唔老死，都有可能死於畀瓢蟲等嘅獵食者捕食」呢一點，具體數值嚟自打前研究嘅估計 
     if age >= 1.00
       隻蟲有若干機率會遷徙； # 同一道理，具體數值嚟自打前研究嘅估計
       隻蟲有若干機率會繁殖，繁殖會產生新嘅個體，呢啲個體 age 冚唪唥係 0.00； # 同一道理，具體數值嚟自打前研究嘅估計
     
       # 已知蚜蟲嘅遷徙同繁殖會受氣溫等嘅環境因素影響，即係 繁殖率 $=f($環境因素$)$
   $t$ 上升 1；（5）

然後研究者就可以教個程式計出笪地方「每日有幾多隻蚜蟲」，並且將呢啲數值以曲線噉嘅形式呈現出嚟－即係好似上圖噉 X 軸係時間 Y 軸係種生物嘅個體數量；跟住佢哋攞呢啲數值同實際數據對比（生態學家打前有實質噉攞數據，量度環境入面嘅蚜蟲數量）。佢哋發覺模擬得出嘅數值同實際數據相當吻合，提議可以攞個模型去估計蚜蟲嘅繁殖，幫手防治蚜蟲。

睇埋

• 瓢蟲
• 胸喙亞目