貝葉斯腦假說

貝葉斯腦假說（英文：Bayesian brain hypothesis）係認知科學上嘅一個假說。根據貝葉斯腦假說，一個心靈學習嗰陣係做緊貝氏推論（Bayesian inference），即係話個心靈會透過自己過去嘅經驗，計算一大柞 $P(A|B)$ 嘅數值，以此表示自己對「世界係點運作」嘅認識，而呢個知識表示就係所謂嘅「對世界嘅內部模型」（internal model of the world）－假想有兩件事件，$A$ 同 $B$，$P(A)$ 係 $A$ 發生嘅機會率，$P(B)$ 係 $B$ 發生嘅機會率，根據貝葉斯定理（Bayes' theorem），$P(A|B)$（已知 $B$ 發生咗，$A$ 發生嘅機會率）可以用以下呢條式計：

$P(A|B)={\frac {P(B|A)\,P(A)}{P(B)}}$

舉個例說明，有一個地區，個地區嘅人當中有 0.1% 嘅都有一隻病（$P(A)=0.001$）；而家有個新測試（「測試出陽性反應」係 $B$），而打前嘅醫學研究顯示，如果個病人真係有嗰隻病，個測試有 90% 機會呈陽性反應（$P(B|A)=0.9$），但就算個病人冇嗰隻病（$A'$），個測試都有 9% 嘅機會呈陽性反應（$P(B|A')=0.09$，$P(B)$ 大約係 0.1）。家吓有個住喺呢個地區嘅人去做咗個測試，出咗陽性結果，用貝葉斯定理嚟計嘅話，佢真係有嗰種病嘅機會率（$P(A|B)$）大約係 10% （個測試唔多靠得住）。

例如想像一個實驗：隻動物經歷 10 次受痛楚嘅事件（$P(A)$），而喺某幾次事件當中佢有嘗試避開個痛楚（$B$），喺某幾次入面佢冇（$B'$），但次次都一樣遭受痛楚；佢個腦計咗之後會發現，自己行動咗跟住受痛楚嘅機率（$A$ given $B$）同自己唔行動而受痛楚嘅機率（$A$ given $B'$）相約，$P(A|B)=P(A|B')$－即係一個「我作唔作出行動結果都係會受痛楚」嘅知識表示，令佢進入習得性失助（learned helplessness）嘅狀態。

睇埋

• 認知科學
• 學習
• 機械學習