資源為本觀點粵拼zi1 jyun4 wai4 bun2 gun1 dim2英文resource-based viewRBV)係策略管理上嘅一個觀點,主要用嚟分析公司競爭優勢。最基本上,資源為本觀點嘅思考出發點在於一個明顯嘅事實-公司與公司之間喺手頭上有嘅資源並唔一樣[1]

  • 喺 RBV 分析上,「資源」可以包括一間公司有嘅資產人力資源資訊知識以至組織結構-總之由間公司擁有、可以俾間公司攞嚟幫自己達到目的嘅嘢冚唪唥都可以算係資源。
  • 一間公司可以具有競爭優勢-指令到一間公司成功噉喺競爭當中打低同行嘅因素,而競爭優勢有可持續不可持續之分,可持續性嘅競爭優勢係指對手難以複製嘅競爭優勢,所以能夠持續一段耐嘅時間。
  • 理論上,如果一個經濟體入面嘅公司喺資源上完全一致,或者資源能夠完全自由噉喺公司之間流動[註 1],可持續嘅競爭優勢唔會存在-一旦一間公司得到個競爭優勢,佢啲同行因為具有完全一樣嘅資訊同埋能力,所以能夠即刻複製個優勢[註 2],於是個經濟體話咁快就變返完全均一嘅狀態。

因為噉,可持續嘅競爭優勢必定源自一間公司有啲資源係佢同行冇嘅(稀缺),而噉亦都表示,喺一間公司嘅決策者喺分析要點樣得到競爭優勢嗰陣,第一樣要諗嘅就係自己有嘅資源當中有邊一啲係同行冇嘅以及自己點樣防止呢啲資源流去同行嗰度[2][3]

四大條件 編輯

睇埋:競爭優勢

根據 RBV,以下呢四大條件係可持續嘅競爭優勢嘅必要條件[1]

  • 件資源係有價值嘅,可以用嚟幫助創造經濟價值
  • 件資源唔係個個都有嘅,而且一般認為,件資源愈罕有就愈好;
  • 件資源係難以複製嘅;
    • 管理學者指出,啲資源難複製好多時都係因為間公司嘅歷史-例如係「同某間大公司嘅長期合作關係」呢樣嘢係難複製嘅資源,而且好多時源自兩間公司嘅歷史背景當中嘅事件;
    • 亦有學者指出,因果關係複雜性亦可以係難複製嘅資源嘅來源,即係好多時間公司嘅架構複雜得滯-搞到啲同行(至少喺短時間內)難以搞清楚佢邊一件資源係最為佢帶嚟競爭優勢嗰件;
    • 除此之外,件資源本身嘅複雜性亦都可能搞到件資源難複製;
  • 件資源冇或者少替代品

睇埋 編輯

註釋 編輯

  1. 就好似廿世紀上半橛嘅經濟理論裏面嗰啲理想化經濟體噉。
  2. 喺現實世界,帶頭嘅公司依然有可能得到所謂嘅第一個郁先優勢(first mover advantage),例子可以睇吓版權專利等嘅概念。不過而家想像一個理想化嘅環境-公司之間就連喺「經營嗰樣優勢嘅權利」呢點上都一樣。

編輯

  1. 1.0 1.1 Barney, J. (1991). Firm resources and sustained competitive advantage. Journal of management, 17(1), 99-120.
  2. Henderson, R., & Cockburn, I. (1994). Measuring competence? Exploring firm effects in pharmaceutical research (PDF). Strategic management journal, 15(S1), 63-84.
  3. Priem, R. L., & Butler, J. E. (2001). Is the resource-based "view" a useful perspective for strategic management research? (PDF). Academy of management review, 26(1), 22-40.