都市日報 (香港版)

香港版《都市日報》係全球首份中文版《都市日報》，亦係香港首份免費報紙，喺2002年4月15號發行，最初係喺星期一至星期六朝早喺地鐵網絡嘅觀塘綫、荃灣綫、港島綫、東涌綫、機場快綫、將軍澳綫（2002年8月19號起）同埋迪士尼綫嘅地下鐵站同埋商業區免費派發，至2003年改為喺星期一至星期五朝早派發。

兩鐵合併同埋將軍澳綫康城站啟用後，《都市日報》重由2009年3月23號開始喺原九廣鐵路網絡嘅東鐵（紅磡站、旺角東站、太和站、上水站除外）、馬鞍山鐵路（車公廟站、石門站、大水坑站、烏溪沙站除外）同埋喺7月27號開始喺康城站派發。

《都市日報》喺香港嘅成功，好快帶動起一股免費報紙嘅發行熱潮，促成2005年《頭條日報》、《Am730》同埋《快線周報》加入市場。

股權變動

• 2013年7月，香港生意人黃浩以2億收購《都市日報》香港版嘅全部股權。

• 2017年9月，黃浩再以4億賣盤畀一間冇傳媒經驗嘅金融公司。

• 2018年2月，黃浩宣佈作價5億買返《都市新聞多媒體》45%股權。

• 2019年10月，《都市日報》得到日本買方全面收購，由2號開始唔再喺港鐵站內派發報紙，會重新規劃派發點，網絡業務就會持續，並會加強發展成為網上新聞同埋消費資訊平台，不過日本買家後來撻訂，12月18號《都市日報》印刷版停刊，2020年1月閂埋網站，同時《都市日報》開始成日傳出炒人、冇糧出嘅新聞。

事幹

• 2019年8月5號，香港民間人士發起八五三罷（「罷工」、「罷課」同「罷市」），《都市日報》嘅製作部門受影響，6號暫停印刷出版一日。

出面網頁

• 都市日報嘅官方網站
• 都市日報嘅Facebook頁
• 香港網絡大典：都市日報