額葉功能低下
額葉功能低下（粵拼：ngaak6 jip6 gung1 nang4 dai1 haa6；英文：hypofrontality）係腦嘅一種狀態，指前額皮層（大腦皮層最近額頭嗰忽）得到嘅血少咗，令到嗰頭啲細胞活動下降[1]。
前額皮層負責做多種「高階」（同意識零舍有關）嘅認知功能，例如係工作記憶以及注意力嘅控制，所以額葉功能低下會搞到呢啲認知功能失靈，而事實係研究證實咗，額葉功能低下同好多意識異常嘅心理狀態有相關[2]。
行為相關 編輯
睇埋：意識
不受控嘅額葉功能低下可以係某一啲心理病嘅徵狀：研究顯示，過度活躍症、精神分裂同抑鬱症等嘅病都同不受控嘅額葉功能低下有關[3]；好似係過度活躍症噉，廿世紀嘅心理學研究表明咗，前額皮層對有意識嘅注意力控制嚟講不可或缺－例如神經成像研究發現，前額皮層喺個人特登專心嗰陣會零舍活躍；而過度活躍症其中一個最大係徵狀患者難專心，所以好多心理學家就作出假說，認為不受控嘅額葉功能低下會係過度活躍症嘅其中一個神經性特徵，而呢個假說喺廿世紀尾經已得到多份研究證實[4][5]。
另一方面，額葉功能低下又可以係反映一個人有意噉進入意識異常嘅狀態：工作記憶同有意噉控制注意力等嘅認知過程都係意識嘅重要部份，所以理論上，如果控制呢啲功能嘅前額皮層活動受壓抑，應該會對個人嘅意識產生具體嘅影響[6]；好似係冥想同心流體驗等嘅特殊意識狀態都被指涉及一個人特登做一啲嘢，引致自己嘅腦出現短暫額葉功能低下（指維持一段短時間嘅額葉功能低下）[6][7]。
睇埋 編輯
英詞 編輯
- 前額皮層 / cin4 ngaak6 pei4 can4 / prefrontal cortex，PFC
- 短暫額葉功能低下 / dyun2 zaam6 ngaak6 jip6 gung1 nang4 dai1 haa6 / transient hypofrontality
文獻 編輯
- Dietrich, A., & Al-Shawaf, L. (2018). The transient hypofrontality theory of altered states of consciousness (PDF). Journal of Consciousness Studies, 25(11-12), 226-247.
攷 編輯
- ↑ Dietrich, A. (2003). Functional neuroanatomy of altered states of consciousness: The transient hypofrontality hypothesis. Consciousness and cognition, 12(2), 231-256.
- ↑ Dietrich, A. (2007). Introduction to consciousness. London: Palgrave Macmillan.
- ↑ Molina, V.; Sanz, J.; Reig, S.; Martínez, R.; Sarramea, F.; Luque, R.; Benito, C.; Gispert, J. D.; Pascau, J.; Desco, M. (2005). "Hypofrontality in men with first-episode psychosis". The British Journal of Psychiatry. 186 (3): 203–208.
- ↑ Zang, Y. F., Jin, Z., Weng, X. C., Zhang, L., Zeng, Y. W., Yang, L., ... & Faraone, S. V. (2005). Functional MRI in attention-deficit hyperactivity disorder: evidence for hypofrontality (PDF). Brain and Development, 27(8), 544-550.
- ↑ Bullmore, E.; Brammer, M.; Williams, S. C. R.; Curtis, V.; McGuire, P.; Morris, R.; Murray, R.; Sharma, T. (1999). "Functional MR imaging of confounded hypofrontality". Human Brain Mapping. 8(2–3): 86–91.
- ↑ 6.0 6.1 Dietrich, A., & Stoll, O. (2010). Effortless attention, hypofrontality, and perfectionism. Effortless attention: A new perspective in the cognitive science of attention and action, 159-178.
- ↑ Dietrich, A., & Al-Shawaf, L. (2018). The transient hypofrontality theory of altered states of consciousness. Journal of Consciousness Studies, 25(11-12), 226-247.