香港一千蚊紙
一千蚊紙（1000元紙幣）係現時流通嘅香港銀紙之一，面值1000港元，係香港最大面額鈔票，目前分別由3間發鈔銀行發行。由於1000蚊紙一直都係以金色為主調，所以香港民間由500蚊紙嘅俗稱「大牛」引申出「金牛」呢個稱呼。以鈔票冧巴計，1000蚊紙係出得最少嘅銀紙之一。
歷史 編輯
1000蚊紙嘅歷史最早可以追溯到1860年代，當時東藩匯理銀行曾經出過面值1000港元嘅樣票，冇喺市面流通。實際上，對於當時月薪得幾蚊嘅市民嚟講，1000蚊係天文數字。慳度士丹中國日本匯理銀行亦喺差唔多同一時期出過1000蚊紙樣本。
直到1977年，香港上海滙豐銀行至首次出1000蚊紙，渣打銀行其後亦喺1979年出1000蚊紙，兩間銀行嘅1000蚊紙尺寸同埋色水一樣。
自1985年起，兩間發鈔銀行重新設計1000蚊紙，尺寸「縮水」，變成家下嘅大細。喺1988年，滙豐銀行改以淺金色印刷1000蚊紙，原因可能係原有設計隻色太深，同樣現象亦出現喺20蚊同埋100蚊紙身上。
喺1993年，兩間發鈔銀行因應香港主權移交臨近，改咗原本帶有英國色彩嘅鈔票設計。不過，渣打銀行嘅鈔票變動唔大，沿用以往嘅「龍」圖案。到咗1994年，中國銀行香港分行（即後來嘅中銀香港）亦加入發行1000蚊紙。
喺2003年，3間發鈔銀行嘅1000蚊紙設計一齊改，加入相近嘅防偽特徵。2010年同埋2018年先後再改設計。
假銀紙 編輯
由於面額大，1000蚊紙係不法份子嘅主要偽造對象，令到市民好驚收到1000蚊紙，免招重大損失，一啲規模較細嘅舖頭，亦成日以「千元鈔票恕不找續」嘅字眼拒收。
2007年3月，香港警方同埋銀行相繼發現過千張已流入市面嘅滙豐銀行2000年同埋2002年版1000蚊紙，涉及面值過百萬蚊，於是銀行開始積極回收呢啲版本嘅1000蚊紙，唔畀佢哋流出市面。另一方面，滙豐銀行開始印多啲500蚊紙，取替俾銀行回收嘅2000年同埋2002年版滙豐銀行1000蚊紙。