黃國樑

黃國樑（1900年7月1號—1978年5月11號），字日如，係中華民國陸軍中將。佢係廣東增城，喺增城縣二龍鄉歐福田村出世。

黃國樑將軍

後生

黃國樑阿爺叫黃玉成，阿嫲姓石。阿爸黃俊朋（一說黃俊明），早年落南洋搵食。阿媽邱阿嬌，係民國期間增城家喻戶曉嘅英雄母親，為地方建設同抗日救國作出過貢獻。黃國樑排第三，仲有兩個大佬繼叔、鏡波，一個細妹榮娣。佢識講廣州話。

黃家務農為業，家道清貧。13歲嗰年佢跟阿媽落咗南洋，喺當地讀書。1917年返唐山，考入雲南陸軍講武堂第十二期步兵科，1919年冬畢業，成績優異。

戎馬生涯

粵軍

1920年5月，黃喺粵軍第一師做過教官、排長。1922年夏，參加攻擊江西陳光遠之戰，1923年，升任東路討賊軍第八旅獨立連連長。佢參加過討伐陳炯明嘅戰役。1924年，參與北江連平戰役，無耐調升師部少校參謀，參與第一次東征。1925年5月，晉升中校參謀處長，跟住參與第二次東征，升任師行營參謀主任。1926年2月，做過國民革命軍第一軍十四師四十團中校附暫代團長。

北伐

1926年7月，國民革命軍誓師北伐。黃做第一軍第一師第三團中校團附。8月，攻打孫傳芳嘅部隊，戰績彪炳，晉升團長。1927年4月，發生四一二事件。黃奉命喺上海清黨，將周恩來組織嘅工人糾察隊繳械。7月，佢率部攻克山東郯城，調任同一個師嘅第一團團長。之後又奇襲龍潭孫傳芳指揮部，解除南京危局，挽回北伐挫勢，因此晉升少將團長。11月，調升第九軍十四師少將副師長並代理師長，無耐接任師長。12月，攻克徐州。

之後，蔣介石派重兵圍剿井岡山、瑞金等地嘅工農紅軍。蔣以黃圍剿不力而撤職。1928年部隊縮編後，做第九軍第二師第四旅旅長，3月9號特任軍事委員會委員。1929年7月，做討逆軍第八路軍總指揮部參事。1930年6月，做武漢行營參議。1931年1月，做第十七軍總指揮部參議。9月，做第四集團軍教導大隊大隊長。1932年，做第一集團軍總部參議。1933年8月，喺廣東陳濟棠屬下，做直屬警衛旅少將副旅長兼第一團團長，1934年7月調任第二團團長。後來仲做過第十八軍副師長等職位。1936年2月5號，國民政府授予黃國樑陸軍少將軍銜。

抗日

1937年7月，抗日戰爭全面爆發。9月，黃時任第十八軍第六十七師少將副師長，率部參加淞滬會戰當中最慘烈嘅羅店戰役，10月接任師長，繼續率部作戰。無耐之後調任第四十六軍第九十二師師長。12月，做長沙警備司令。1938年4月6號，升任陸軍中將。5月，率九十二師擔任徐州會戰右側外圍作戰。9月，積功晉升三十七軍軍長，參加第一次長沙戰役。1939年，佢同其他部分粵軍將領奉命回師廣東，保衛鄉梓。佢做第六十五軍副軍長，1940年2月接任軍長。

1940年，靜君編著嘅戰地新聞通訊集《良口之戰》出版，記載第二次粵北戰役全過程，並有4篇人物通訊，報導戰役主要將領余漢謀（戰役總指揮）、張瑞貴、黃濤同黃國樑。根據《良口之戰》，1940年5月13號，日軍第二次進犯粵北，妄圖奪取曲江，打通粵漢線。日軍司令官安藤利吉指揮，第十八、三十八、一〇四師團，約2萬人，戰車數十部，以及第二十一獨立飛行隊三十幾架飛機，再次向粵北進犯。黃國樑指揮六十五軍，同黃濤嘅六十二軍、張瑞貴嘅六十三軍並肩作戰。國軍依託有利地形，喺前沿逐步阻擊日軍，並誘敵深入。日軍先頭部隊孤軍進至從化良口，俾國軍集中兵力進行圍殲。日軍潰退後，國軍又乘勝追剿，左右包抄，日軍大敗而還。呢一次大戰，「已知敵官兵死亡之數，約四千餘名，死傷合共約在八千以上」，係國軍抗戰以來少有嘅痛快淋漓嘅勝仗。

1940年至1945年春，黃參與指揮三次粵北戰役，保衛咗廣東臨時省會韶關。1945年6月至7月，喺贛南作戰。

1945年9月，抗戰勝利，黃辭去六十五軍軍長職務，返鄉下侍奉阿媽。

國民政府喺1942年授予黃陸海空軍甲種一等獎章，1943年授予干城甲種一等獎章，抗戰勝利後授予抗戰勝利獎章，表彰黃喺抗日戰場嘅卓著功勳。

國共內戰

1946年，國共內戰爆發。7月，黃奉召出任整編六十四師師長。同年兼任徐州綏靖公署參議。1947年春，清剿徐州外圍，擊潰共軍張光中嘅部隊。5月上旬進佔徂徠，中旬援孟良崮，下旬再剿梁邱，6月中旬馳援新泰。6月下旬，蔣介石下令整編十一師、廿五師及黃嘅整編六十四師做攻擊軍，進攻十幾萬共軍華東野戰軍盤踞嘅沂蒙山區，經過四晝夜浴血鏖戰，會師南麻。喺呢一仗，黃嘅部隊虜獲美製步槍、機槍子彈150萬發，未裝火藥嘅手榴彈十幾萬粒，黃色炸藥5噸，炮三十幾門。10月上旬，固守范家集，血戰11日，打死敵軍過萬，乃係黃將軍百戰餘生中最艱苦一仗。1948年春，奉國防部令晉升整編第二軍軍長。又做過第七兵團副司令。1948年11月29號，大軍南移，佢做廣東省保安司令部副司令。1949年8月7號，由廣州飛赴海南，做海南警備副司令。1950年，海南失守，佢同一班廣東出身嘅將領多數去咗香港。1951年，佢去臺灣。

晚年

黃喺台灣做國防部中將高參。1959年10月退役。退休之後，黃住喺苗栗。佢為人淡泊名利，生活低調。

過身

1978年5月11號中午12點18分，黃國樑將軍喺台北榮民總醫院因食道癌病逝。6月9號上晝大殮，遺體安葬喺台北縣（今新北市）中和鄉春秋墓園。7月9號，喺香港有追悼會，何世禮將軍、陳克華將軍等五百幾人致祭。

屋企人

老婆梁碧蓮（？–1986年1月13號），仔浩凖，女惠文，女婿姓管。

軼事

喺香港調景嶺生活嘅國軍老兵陳寶善（演員陳玉蓮之父），係黃嘅增城鄉里同部下。1947年范家集一戰，東門失守，黃幾乎要自殺，陳率隊重奪東門，黃感激不已。

佢同陳誠友好。試過陳誠做副總統嘅時候，去苗栗視察，邊度都唔去住，而揀喺黃家下榻。