黐電係種廣東常見嘅中小學生玩耍,係種集體遊戲。 一般一舖玩兩個鐘頭,好用體力

玩法 編輯

將人當係兵,分兩隊,每隊搵條大本營,兩條柱通常隔個球場或一段咁長路。每隊要諗辦法摸對方大本營。兩隊由自己大本營出發,去攻擊對方大本營。呢個遊戲最終目的,就係有電兵,喺敵兵俘虜唔到你之下,掂到敵方條柱。又或者,係將敵兵全部捉到你嘅大本營,你可以大搖大擺咁去掂人哋個柱。

充電 編輯

之但係,喺自己大本營出發前,要摸摸自己大本營先,謂之『充電』。如果半路遇到敵兵,敵兵充電喺自己之後,敵兵就叫『新電』,如果敵兵充電喺自己之前,就叫『舊電』。

俘虜 編輯

新電可以捉舊電,舊電唔可以捉新電。亦即係話,舊電俾新電掂親,就做咗俘虜。俘虜要跟住去到敵方大本營,用手掂住敵方大本營,新俘虜掂住舊俘虜,拖成一串俘虜。

救兵 編輯

咁,我方見到自己兵畀人俘,就要過去救。救兵一定要有電,即係掂過自己大本營,而冇用過自己電來捉人,又唔係啱啱畀人救嘅兵,先至可以做救兵。救兵要防住敵方新電兵。敵人可以匿喺對面街,後面街市,天橋上便,單車線隔離個花叢入邊,好危險嘅。假如中間畀人捉,就會連自己都埋俘虜。

我方救兵嘅任務,系去掂俘虜之中任何一個自己友。一掂,成班俘虜就即救。但係個救兵就冇晒電嘅,任何敵兵掂到,都要做俘虜。救完人無晒電,亦都唔可以去攻擊敵人大本營柱,要即刻返自己大本營充電.