2011年6月澳門新橋區大規模停電事件
2011年6月澳門新橋區大規模停電事件響2011年6月17號發生，係一個月入面第三次發生嘅區域性廣泛停電事故，停電時間最長去到三十八分鐘[1]。
背景 編輯
2011年6月17號晏晝十二點四十五分，新橋區好多地方廣泛停電，二千幾戶受影響。澳電話係由於亞豐素街濠江小學附近一段地下高壓電纜壞咗，搞到亞豐素街、渡船街、賈伯樂提督街、美的路主教街同盧九街一帶部分用戶停電。澳電話已經即時派人搶修，重全面核查確保系統安全同供電良好，停電廿一分鐘之後陸續恢復供電，停電三十八分鐘之後全部正常。澳電對受影響用戶致歉[1]。
時間 編輯
| 時間 | 事情 |
|---|---|
| 6月17號 | 新橋區好多地方廣泛停電[1]。 |
| 12:45 | |
| 13:06 | 陸續恢復供電[1]。 |
| 13:23 | 全部復電[1]。 |
影響 編輯
停電令到區入面唔少舖頭做唔到生意，停電響午飯時間發生，唔少食肆逼滿客人，突然停電搞到食肆員工拿手唔成世。停電冇冷氣，客人都走嗮。有食肆負責人話：「停電搞到生意大受影響，真係多得電力公司唔少。」而停電期間亦搞出笑話，響盧九街做小本生意嘅兩公婆舖頭，響停電一刻舖頭入面冇冷氣搞到好焗，老婆情急之下叫老公開風扇，但係冇電又點開？亦有電器行員工話，停電搞到佢嚇咗一跳，因為多部大型電視機突然「噗」一聲就熄嗮，以為電視機爆炸，即刻走出舖頭，好彩係虛驚一場。亦有中藥房負責人話，擺藥嘅凍櫃因為冇電唔著，幸好停電時間唔長，所以影響小啲。有珠寶金行人員因為擔心安全問題，停電之後索性拉閘，唔做住生意。停電亦影響澳門電訊三個3G服務發射機站，搞到部分室內流動寬頻受到輕微影響，話音同固網電話服務運作正常，澳門電訊冇收到任何中斷服務查詢。其餘三間流動電話服務營運商話冇受影響。數碼通話，發射機站有後備電，停電亦可以維持幾個鐘正常運作[2]。
後續 編輯
澳電 編輯
澳門電力公司決定邀請獨立第三方全面評估澳電，包括澳電人員嘅培訓、搶修計劃同投資等，希望長遠改善停電嘅應變措施。短期措施就會加密變電站嘅檢查次數，由原來每四個月檢查一次縮短到每個月檢查一次。澳電話極度關注近期接連發生嘅三次停電事故。根據澳電嘅內部評估，三次停電事故涉及變壓器同電纜接口壞咗，唔存在結構性同系統性問題，澳門電網重係相對安全[2]。
能源業發展辦公室 編輯
能源辦主任山禮度話，連續幾次停電有咩處理同罰則，佢哋會考慮，由於中午停電事出突然要時間了解。至於根據專營合約澳電要負啲咩嘢責任同情度嚴重性，山禮度冇進一步講明，亦都冇評論今次停電半個鐘澳電嘅復電工作有冇進步，補充要等澳電提交報告先分析到事件嚴重性[1]。