巴洛克舞蹈

(由Belle danse跳轉過嚟)

巴洛克舞蹈英文Baroque dance法文Danse baroque)係泛指巴洛克時期(大約 1600 年至 1750 年之間嘅歐洲)嘅貴族之間盛行嘅舞蹈,包括咗莎拉班德布尼舞曲小步舞曲等嘅多種舞曲同舞蹈。巴洛克舞蹈同巴洛克音樂關係密切-莎拉班德、布尼舞曲同小步舞曲呢啲同時亦都係巴洛克音樂當中嘅重要曲種,有巴哈嘅《G 大調同 G 小調小步舞曲》等等嘅好多首名曲[1]

1899 年嘅一幅圖畫;幅畫描繪一男一女跟阿里曼德跳舞。

巴洛克舞蹈係巴洛克時期嘅一種重要表演藝術:巴洛克舞蹈零舍盛行於當時嘅法國,例如喺路易十四(Louis XIV)下嘅法國宮廷貴族舞會嗰時就成日都會跳呢啲舞;而因為法國係當時歐洲首屈一指嘅文化大國,所以巴洛克舞蹈就同第啲表演藝術有碰撞同交流,因而同呢啲藝術互相影響,例如巴洛克時期正正係古典芭蕾舞萌芽嘅時期,而呢兩種舞之間嘅互相影響到咗今日都仲睇得到-巴洛克舞蹈有用到五大腳位呢種現代嘅芭蕾舞基礎技巧[2]

喺巴洛克時期之後,巴洛克舞蹈隨住貴族制喺歐洲沒落(睇埋法國大革命)而慢慢噉走向咗式微,但响廿世紀後半橛,有人摷得返巴洛克時期啲舞譜出嚟,仲開始喺度嘗試搞復興巴洛克舞蹈,想重振呢種巴洛克文化[1][3]

舞曲種類 編輯

 
呢幅圖畫描繪一男一女喺度跟小步舞曲跳舞;小步舞可以話係比較保守,男女雙方淨係對手掌會掂住,唔似得例如華爾滋噉會用封閉位

巴洛克舞蹈當中用到嘅舞曲有好多種,呢啲舞曲同時亦係巴洛克音樂當中嘅出名曲種

 
《D 小調鍵盤組曲 HMV 437》
第四樂章嘅一個版本
  • 阿里曼德(Allemande;法文「德國式」噉解):源自 16 世紀德國嘅一種舞曲,不過係由法國發揚光大嘅,好似巴哈(Bach)同韓德爾等嘅作曲家都作過阿里曼德;喺音樂特性上,阿里曼德 4/4 拍,有好似下圖噉嘅節奏,速度傾向喺 100 bpm 上下(算係微快),形式上傾向用二段體十六分音符零舍多[6];有啲學者覺得,阿里曼德係一種好「嚴肅同儀式化」嘅舞,忌切分音(指啲特登唔跟拍子嘅音),傾向表達滿意等正面得嚟輕微嘅情緒,成日俾人攞嚟做一套組曲嘅第一樂章[7]
 
  • 夏康舞曲(Chaconne / Ciaconne):喺 1600 年代左右經已存在喺西班牙嗰度嘅一種舞曲同舞蹈,出名嘅作品有巴哈嘅《小提琴第二變奏曲》(Partita for Violin No. 2)嘅最終樂章;喺音樂特性上,夏康舞曲係三拍子音階上通常係大調,速度冇乜點定,俾人話會令聽嘅人有一種「輕盈」嘅感覺[5]。喺舞步上,傳統嘅夏康舞曲一般會由一男一女一齊跳或者一個女人單獨噉跳,好多時都會帶有些少挑逗性(因而喺初頭嗰陣受到保守啲人士批評)[8]
《小提琴第二變奏曲》最終樂章
小提琴獨奏
  • 小步舞曲(Minuet):源自 17 世紀中嘅法國貴族圈子嘅一種舞曲,例如舉世聞名嘅巴哈小步舞曲就係一首小步舞曲;喺音樂特性上,小步舞曲通常用 3/4 拍號,有好似下圖噉嘅節奏,有陣時亦會用 3/8,數起拍子上嚟通常會係每週期兩段節拍(總共 6 吓拍子);首音樂多數分兩段,而且兩段都各自成二段體;喺舞步上,小步舞曲通常會係一男一女成雙成對噉嚟跳,雙方會拖住手噉跳,但身體唔會掂得太埋(唔似得例如華爾滋噉會用封閉位),喺巴洛克時期係貴族圈子當中常見嘅社交舞[9]
 
《巴哈小步舞曲》
  • 積古(Gigue;意大利文:Giga):一種受到英格蘭民俗舞曲積舞曲(Jig)影響嘅法國舞曲,喺意大利都幾盛行;喺音樂特性上,積古嘅拍號傾向係 3/8 或者係 3/8 嘅複合節拍(6/8、9/8 或者 12/8 呀噉),音樂速度上通常偏快(尤其係意大利嘅積古零舍快),好多時會超過 200 bpm 咁快,而另一個特徵係成日都會有好多三個做一組嘅八分音符(好似下圖嗰個例子噉;呢點同積舞曲好相似);喺組曲當中,基格通常都係做最後嘅樂章。啲人跳積古嗰陣,通常係一對對男女成雙成對噉跳嘅,好似芭蕾舞嘅雙人舞(pas de deux)噉[10]
 
  • 布尼舞曲(Bourrée):源自 17 世紀中之後,呢種舞曲出嗮名成日俾人攞嚟做芭蕾舞嘅配樂,而且芭蕾舞入面仲有咗布尼舞步(pas de bourrée)呢隻以布尼舞曲命名嘅舞步;布尼舞曲喺巴洛克舞蹈上都會用到,音樂特性係興用 4/4 拍同埋喺一條小節最後嗰吓拍子嘅後半橛做起始,會有好似下圖噉嘅樣嘅節奏,速度上傾向快過加霍(睇下面),通常起碼會有 130 至 140 bpm 左右;啲人喺跟布尼舞曲跳舞嗰陣,通常會做好多細嘅跳躍彈上彈落噉[11]
 
巴哈《E 小調布尼舞曲
  • 加霍(Gavotte):源自 17 世紀尾嘅一種法國舞曲,好似巴哈同韓德爾等嘅巴洛克作曲家都作過加霍;喺音樂特性上,加霍嘅典型拍號係 4/4,有好似下圖噉嘅節奏,亦都有 2/2、9/8 同 5/8 呀噉,速度中等,形式上傾向用二段體樂句會喺小節嘅中間起始(尤其係 18 世紀法國宮廷嗰啲加霍);喺舞會上,加霍通常都會喺三拍子嘅小步舞曲之後出現,而响巴洛克嘅組曲裏面就通常會出現喺莎拉班德之後[12]
 

... 等等。

簡史 編輯

 
呢幅 1653 年嘅描繪路易十四喺一齣芭蕾舞劇當中扮演太陽神阿波羅

巴洛克舞蹈泛指巴洛克時期(大約 1600 年至 1750 年之間嘅歐洲)响歐洲貴族之間盛行嘅舞蹈,喺 17 世紀嘅法國宮廷發展得最犀利:

  • 當時法國無論係喺文化經濟實力上都係歐洲嘅強國,吸引咗好多藝術家巴黎等嘅法國大城市嗰度交流;當中法國國王路易十四(Louis XIV;1643-1715)就對音樂舞蹈相當有興趣,佢甚至仲試過親自喺一齣芭蕾舞表演當中飾演太陽神阿波羅,因為噉,法國皇室就自然樂意資助音樂舞蹈方面嘅發展[13]
  • 喺 1661 年,路易十四創立咗皇家舞蹈學院法文:Académie Royale de Danse),並且喺 1672 年委任舞曲大師呂利(Jean-Baptiste Lully)做間學院嘅院長,要呂利幫手發展芭蕾舞等嘅多種舞蹈;呂利做嘅嘢令法國嘅舞曲同舞蹈得到重大嘅進展,例如有好多現代都成日要用嘅芭蕾舞基礎技巧都係多得呂利先至有嘅,令古典芭蕾舞基本上成形-而同時因為布尼舞曲同小步舞曲等嘅舞蹈都經過呂利同皇家舞蹈學院,所以巴洛克舞蹈都會用到好多芭蕾舞嗰啲基礎技巧,例如係五大腳位同埋 plié 呀噉[註 1][14]

順帶一提,有唔少學者都嫌「巴洛克舞蹈」呢個名唔夠精確:原則上,巴洛克時期嘅歐洲嘅舞蹈同舞曲唔淨只得布尼舞曲同小步舞曲等一般俾人嗌做「巴洛克舞蹈」嘅舞曲舞蹈;啲人會嗌呢柞舞曲舞蹈做「巴洛克舞蹈」只不過係因為一般人都傾向將呢啲舞曲舞蹈同巴洛克聯想埋一齊;於是有唔少藝術史等方面嘅學者都會為求精確,而嗌呢啲舞做「法國貴族舞」(French noble;法文:La Danse Noble;因為呢啲舞曲舞蹈同法國貴族有深厚關係)或者「belle danse」-呢個法文詞係「嘅舞」噉解[14]

巴洛克舞蹈喺巴洛克時期打後(法國大革命之後)慢慢噉走向咗式微,但就喺廿世紀尾開始重新崛起:喺 1960 年至 1970 年之間,有舞蹈同音樂方面嘅學者摷返大約 300 份巴洛克時期嘅舞譜出嚟,並且嘗試按呢啲舞譜重新建構返嗰個時期嗰啲舞蹈同埋舞曲;呢啲工作吸引咗芭蕾舞等界別嘅工作者嘅注意,最後廿世紀舞蹈學者嘉芙蓮·託路茜(Catherine Turocy)喺 1976 年成立咗紐約巴洛克舞團(The New York Baroque Dance Company)表演巴洛克舞蹈,正式令呢種古典嘅舞蹈重新出現喺舞台上面[15]

註釋 編輯

  1. 不過巴洛克舞蹈同芭蕾舞依然有唔少差異,尤其係冇芭蕾舞咁多向上嘅郁動-巴洛克舞蹈唔似得芭蕾舞噉會用腳尖企,正常嚟講亦都唔會做啲大嘅跳躍或者有「捧起舞伴」嘅動作。

睇埋 編輯

編輯

  1. 1.0 1.1 Sparti, B. (1996). Breaking down barriers in the study of Renaissance and Baroque dance. Dance Chronicle, 19(3), 255-276.
  2. Baroque Dance. Library of Congress.
  3. Pierce, K. (2008). Choreographic Structure in Baroque Dance. Dance, Spectacle, and the Body Politick, 1250-1750, 182-208.
  4. Hicks, Anthony (2001). "Handel, George Frideric". In Sadie, Stanley; Tyrrell, John (eds.). The New Grove Dictionary of Music and Musicians. x (2nd ed.). London: Macmillan. p. 804.
  5. 5.0 5.1 Dance Rhythms for Ballet Pianists. RAD.
  6. A Baroque Glossary.
  7. Blatter, Alfred (2007). Revisiting music theory: a guide to the practice, p.28.
  8. Alexander Silbiger, "Chaconne," The New Grove Dictionary of Music and Musicians, ed. Stanley Sadie and J. Tyrrell (London: Macmillan, 2001).
  9. Little, Meredith Ellis. 2001. "Minuet". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
  10. Gigue. Encyclopedia Britannica.
  11. Scholes, Percy, The Oxford Companion to Music, OUP, 1970, article; Bourrée.
  12. Meredith Ellis Little and Matthew Werley, "Gavotte", The New Grove Dictionary of Music and Musicians, 2nd edition, (London: Macmillan Publishers).
  13. Clarke, Mary; Crisp, Clement (1992). Ballet: An Illustrated History. Great Britain: Hamish Hamilton. pp. 17–19.
  14. 14.0 14.1 Little, Meredith Ellis and Marsh, Carol G. La Danse Noble, An Inventory of Dances and Sources, (Broude Brothers Ltd, 1992).
  15. Sulcas, Roslyn (September 16, 2007). "Baroque Holds Court for a New Age" 互聯網檔案館歸檔,歸檔日期2018-01-16. The New York Times.

編輯