反對用僞本字

  • 有啲粵維編輯成日用「僞本字」,即係搵個違反約定俗成寫法嘅字,經一輪穿鑿附會,夾硬話佢係「本字」。呢樣嘢非常錯。
  • 退一步嚟講,就算佢眞係本字,文字喺後世經過約定俗成而有變化,寫出嚟人人明白,唔見得要阿茂整餅回退到「本字」,開歷史倒車。例如「悅」嘅本字係「說」,如果你唔寫「喜悅」,寫「喜說」,有幾多人會明?
  • 更何況好多時啲論證都係穿鑿附會,經不起考驗,認眞檢視就會發現漏洞處處嘅。
  • 以「重」代「仲」係數一數二反感嘅。啲所謂古籍用法根本夾硬嚟,人哋都唔係用「zung6」嘅音義。而且以「重」代「仲」明顯會帶嚟歧義,但係啲人爲咗所謂「本字」死都要亂用。呢樣嘢我超反感。

唔再強制唔畀人submit

要推廣粵文,就要有更多人寫。幫手寫粵文維基百科係其中一個途徑。不過對新登記嘅朋友嚟講,過程可能會有好多阻滯。粵文維基會有堆檢査器自動套用喺新用戶身上,當中有粵文檢査器、連結檢査器等等。尤其是粵文檢査器,只要佢檢査到有唔符合粵文嘅詞語,用戶就冇得submit篇文章。我明白佢個原意係避免啲人掟堆官話文上去,立意係好嘅。弊在個檢査器成日走火,明明你眞係寫粵文,佢都會成日話你唔係,唔畀你submit。

經過商議之後,今日起,粵文維基已經將呢個檢査器改做只係彈出警告提示。新用戶submit佢嘅編輯時,檢查器都會check一次,如果覺得唔符合粵文,佢都會彈警告出嚟。不過大家認眞再check過,冇發現有咩地方唔啱嘅話,再撳submit就OK,唔會好似以前噉唔畀你submit。

希望呢個改變,可以減少大家寫粵文條目的阻滯,令多啲朋友幫手寫粵語文章。