Wikipedia:是日正文/2020年7月

統計學嘅常態分佈

統計學係數學嘅一個子領域，專係研究點樣喺各個科學領域嗰度搜集、分析、演繹、同埋呈現數據。喺用統計方法嚟研究啲乜嗰陣，個科學家會（一）先講明咗佢研究緊乜嘢變數；（二）跟手就揾一個特定嘅總體嚟研究；（三）由呢個總體嗰度抽個樣本出嚟；（四）喺個樣本度收集數據，睇吓個樣本入面每一個個體喺啲變數嗰度嘅數值係幾多；（五）用某啲統計分析方法嚟去揾出柞變數之間有乜嘢關係。

例如有個生物學家想研究吓狼嘅獵食行為同佢哋身處地方嘅氣候之間有冇乜嘢啦掕。喺呢份研究入面，（一）佢所研究緊嘅變數就包含咗喺「啲狼嘅獵食行為」同「啲狼身處嘅地方嘅氣候」入面；（二）佢會將成個世界嘅狼擺埋一齊研究；（三）但係世界上噉多隻狼，攞嗮佢哋嚟研究太嘥時間，所以佢就用隨機抽樣－隨機噉由全世界嘅狼嗰度抽一部份嘅出嚟研究；（四）跟住佢就要向個樣本收集數據，用各種嘅方法去量度樣本入面嘅每一隻狼嘅獵食行為（好似係佢每日用咗幾多個鐘頭獵食、食咗幾多公斤嘅嘢食呀噉）同埋佢身處地方嘅氣候（好似係嗰個地區落雨落得有幾密同埋平均氣温等等）；（五）攞完數據之後就用各種嘅統計分析嚟去計吓呢柞變數之間有乜嘢啦掕。同樣嘅做法喺物理科學同社會科學嗰度都會用。

到咗現代，統計學經已係科學研究上走唔甩嘅一個部份，幾乎所有大學科學學科嘅本科課程都會教少少統計學嘅嘢。(成篇文章……)

以前嘅正文： 地球 – 物理 – 香港文化