X-Plane》係美國Laminar研究室開發嘅一款飛行模擬器,原本係為蘋果麥堅托X操作系統開發嘅,但係宜家已經有埋微軟視窗版本同埋Linux版本。

《X-Plane》唔單止有各種各樣嘅歐美軍用同民用飛機,以及從世界各地取材嘅場景,重附帶有免費嘅設計程式,等用戶可以設計自己心目中嘅飛行器或者場景。另外,為咗切合唔同用家嘅需求,X-Plane重有三種版本:移動裝置版本、座機版本同專業飛行訓練版本——由Laminar為用家度身訂造,並且得到美國聯邦航空局認可嘅全機艙模擬器[1]

分級 編輯

ESRB ACB
   

譯名 編輯

《X-Plane》目前無正式嘅中文譯名,但係就有一個中文社區 X-Plane.cn

核心 編輯

《X-Plane》同其他飛行模擬器最大嘅區別,就係採用咗「翼鋒元素理論」[暫譯](英文:Blade Element Theory[2]。傳統嘅飛行模擬器通常係將現有飛行器已知嘅飛行數據(例如唔同環境裡面嘅昇力同埋阻力)儲存起身,到用家玩嘅時候再將需要用嘅數據調出來。伊種做法可以相當準確咁模擬出已知飛行器嘅表現,但係預測唔到未知飛行器嘅表現,因此對設計新飛行器一啲幫助都無。翼鋒元素理論嘅做法,就係將一架飛行器分拆成幾個部份,分別計算出每個部份嘅飛行數據然後再彙總。咁樣一來,設計師就可以通過電腦實時計算飛行數據,來盡可能準確咁模擬出一架未知飛行器喺真實世界裡面會點表現。應用咗翼鋒元素理論嘅X-Plane,可以模擬出相當複雜嘅飛行器(例如直升飛機、旋翼機、傾轉旋翼機、固定翼垂直起降飛機甚至火箭)嘅飛行表現。目前,喺座機版本上面已經模擬到出來嘅複雜飛行器包括:「興登堡」號齊柏連飛艇、美國太空穿梭機、鷂式戰機、V-22「魚鷹」傾轉旋翼機同埋「太空船1號」亞太空飛機等等。但係翼鋒元素理論都有一個缺點,就係要設計一架同現實中嘅飛機表現相似嘅飛機好困難,需要修改好多次,模擬飛機嘅表現先至會夠逼真。

擴展性 編輯

同《微軟模擬飛行》唔同嘅係,《X-Plane》附帶一個設計程式,並且鼓勵用家設計最啱自己心水嘅飛行器,因此網上有好多嘅《X-Plane》設計師群體。由於用X-Plane設計程式設計新飛行器相對簡單,修改過嘅模型又同真實世界入面嘅飛行器嘅表現好相似,因此唔少飛機公司都用《X-Plane》來協助設計,或者訓練飛行員。另外,用家重可以通過插件來修改操控界面同飛機外形,甚至建立新功能。其中一個比較出名嘅插件係XSquawkBox,一個畀用戶喺用《X-Plane》開飛機嘅時候,使用一個全球空管模擬器嘅插件。《X-Plane》亦都可以通過用戶數據報協議同其他應用程式互通,甚至共享數據。Scaled Composites喺設計「太空船1號」嘅時候,就曾經將《X-Plane》接入佢等自己嘅模擬器來收集數據,用來推測「太空船1號」嘅表現。 雖然《X-Plane》無自帶嘅場景設計程式,但係用家可以使用AC3D來修改場景。另外,用家亦都可以用任何處理到PNG圖像文件嘅程式來製作機身塗裝同埋其他設計。

參考 編輯

出面網頁 編輯