扒王之王

扒王之王（粵拼：paa4*2 wong4 zi1 wong4）（英文：Steak Expert）係香港一間專營牛扒嘅連鎖式餐廳，全盛時期喺香港各區開設三十幾間分店，最後一間沙田娛樂城分店喺2023年1月15號結業。2020年9月喺旺角彌敦道開咗間名為扒王一哥嘅分店，不過扒王之王喺7月上旬於旺角山東街重新開店後冇幾耐，扒王一哥喺2023年9月頭執笠。公司創辦人係香港息影女星林珍奇個老公李德麟。

扒王之王喺沙田偉華中心分店，喺2015年10月結業

扒王之王喺青衣城分店，喺2010年結業

扒王之王喺小西灣藍灣半島分店，喺2012年結業

歷史

李德麟有長期批發凍肉嘅經驗，1999年決定進軍飲食界，喺九龍紅磡搞間扒王之王，標榜平民價錢食酒店牛扒，得到一時人氣，吸引好多人慕名幫襯。取得成功後，扒王之王不斷喺香港各區開設分店。據香港貿易發展局資料顯示，扒王之王集團有幾百名員工（200至500人）。

特色

扒王之王旗下部份餐廳喺全盛時期用「扒王里」、「扒出味來」，「山口料理」等品牌經營。喺2004年至2006年期間更喺報章同RoadShow等媒體平台進行宣傳。喺2008年金融海嘯時期，為吸客，各間分店甚至搞大特惠嘅「抗海嘯」餐單、免加一服務費、全日八至九折招徠，其中荃灣金荃大廈店（已結業）曾經喺2008年第三季提供$12至$14起嘅午餐外賣飯盒。到2009年1月，尖沙咀分店一連12日用$2或$3象徵式收費，每日賣300個飯盒。

衰落

2010年代初，扒王之王被指食品水準、服務水平漸漸不穩，受到網絡留言攻擊，加上租金大幅上升。結果，扒王之王進入衰落期，多間分店陸續結業。當中喺2014年5月，荃灣分店俾業主指欠租一個月，入稟高院追討租金，並要求餐廳遷出一事被登上報紙。不過，嗰時間舖已經收咗檔。截至2021年2月，扒王之王只剩下沙田唯一一間分店。

事件

2006年6月4號前夕，李德麟用九千蚊月薪請「巴士阿叔」陳乙東做樓面公關。無耐「阿叔」引成班記者登門采訪，之後又有三條大漢上門打佢。老闆娘知事後即向老公炒大鑊，重食安眠藥食到入醫院。最後陳乙東離職。

睇埋

• 花園餐廳
• 扒房
• 李依琳

出面網頁

• 扒王一哥 RIBX嘅facebook頁