社會主義勞動英雄
社會主義勞動英雄（俄文：Герой Социалистического Труда），係前蘇聯頒發嘅一個榮譽頭銜，授予響經濟同文化領域上面作出重大貢獻嘅蘇聯公民，性質同頭銜「蘇聯英雄」好相似，不過獲得「蘇聯英雄」嘅人可以係外國公民。
設立同頒發 編輯
呢個頭銜係由蘇聯最高蘇維埃主席團響1938年12月通過行政命令而設立，而獲得者係對蘇聯工業、農業、交通、貿易、科學同科技嘅發展作出貢獻，並能夠展示蘇聯嘅威武同光榮嘅蘇聯公民。
早期獲得「社會主義勞動英雄」頭銜嘅人會被授予蘇聯等級最高嘅獎章列寧勳章同一份由蘇聯最高蘇維埃主席團簽發嘅證書。後嚟為咗將「社會主義勞動英雄」同其他獲得列寧勳章嘅人區分，主席團響1940年5月通過一份行政命令，獲得「社會主義勞動英雄」頭銜嘅人喺領取列寧勳章同證書嘅同時，重可以獲得一面金牌，金牌上嘅圖案係鐵鎚同鐮刀，而金牌嘅形狀係星形。金牌嘅大細係由史太林制定，響制定獎牌嘅大細嗰時，佢曾經邀請工人同平民戴上唔同大細嘅獎章樣本，最終佢將星形獎牌嘅直徑制定為33.5毫米。
如果一名獲得「社會主義勞動英雄」頭銜嘅人再次為蘇聯的發展作出重要嘅貢獻，最高蘇維埃主席團可以向佢授予另一枚鐵鎚同鐮刀獎章，重會響佢家鄉立一尊銅像，紀念佢對蘇聯嘅貢獻。
獲得嘅人 編輯
第一個獲得「社會主義勞動英雄」頭銜嘅人係蘇聯領導人史太林，佢係響1939年12月獲得呢個頭銜。第二個獲得呢個頭銜嘅人係機關槍設計師瓦西里·捷格加廖夫（響1940年1月獲得）。最高蘇維埃主席團第三次授予「社會主義勞動英雄」頭銜嗰陣時，一共向9個武器設計師授予呢個頭銜，包括費德爾·華西列維奇·托卡列夫、玻利卡爾波夫等等。
三次獲得社會主義勞動英雄稱號嘅人一共有16位，其中包括飛機設計師安德烈·圖波列夫。截至1971年9月，一共有16,245名人士獲得呢個頭銜。響蘇聯解體嗰陣，獲得呢個頭銜嘅人有大約19,000名。1980年1月蘇聯最高蘇維埃主席團曾經通過決議，褫奪抗議蘇聯入侵阿富汗嘅科學家沙哈諾夫嘅頭銜。
參考 編輯
- Oruzhie雜誌，第9頁，1998年第5版同1998年第6版。
- D.Shiryaev：《邊個發明咗了卡拉什尼科夫步槍》，《好運戰士》雜誌，2000年第9版
- Joshua Rubenstein, Alexander Gribanov, The KGB file of Andrei Sakharov，2005，page 248