香港同心會
香港同心會係一個香港激進親中派組織，曾經因為多次抗議行動得到一啲香港傳媒嘅關注。
政治立場 編輯
佢哋係激進親中共派嘅組織，部分成員支持封殺言論自由[1]，亦曾經邀請過親中共派藝人莊思敏出席佢哋嘅活動[2]。對於維吾爾人嘅大清洗議題，佢哋亦曾經表示對於新疆地區存在強迫勞動嘅指控係子虛烏有，係美國同其他西方國家捏造嘅謊言[3]。
名 編輯
佢哋有時會用「香江同心會」或者就咁「同心會」嘅名義活動。《蘋果日報》喺2020年9月27號嘅報導入面提及，佢哋嘅Facebook群組曾經兩個名都用過[1]。
網上活動 編輯
佢哋設有Facebook群組，《蘋果日報》喺2020年9月27號嘅報導入面提及佢哋會員有2500個，但入面好多戶口都係假嘅，並無真實個人資料或相片[1]。
爭議 編輯
環繞香港同心會嘅爭議，好多都係同佢哋嘅政治立場同行動。佢哋有時甚至衝擊民主派人士嘅和平活動，亦試過抗議活動期間未有遵守武漢肺炎之下嘅限聚令，但警察到場後都未有作出檢控。
疑進入港大校園刑事毀壞 編輯
喺2020年9月26號，有人自稱要清理香港啲垃圾，突然闖入香港大學校園，破壞校園內和平表達意見嘅連儂牆。有關情況被錄低咗，片段上載咗去香港同心會嘅Facebook Group，入面有大量嘅人讚好不絕，當中仲包括一啲民建聯嘅成員。雖然佢哋聲稱只係「清潔」香港大學，但記者之後視察就發現，佢哋現場留低大量垃圾，殘留嘅宣傳品、部分被撕下嘅海報遭隨意棄置地下，一片狼籍[4]。不過，亦有一啲藍絲表面唔同意呢啲犯法嘅行為，而港大校方對事件表示遺憾，港大學生會就譴責事件[1]。
抗議品牌停用新疆棉行動涉違反限聚令 編輯
喺2021年3月，多個時裝品牌因為新疆強迫勞動嘅問題，宣布停用新疆棉，引起咗國際社會嘅風波。而包括香港同心會在內嘅一啲激進親中派人士，就發起咗一啲抗議呢啲品牌嘅行動。其中香港同心會就喺3月28號去咗位於尖沙嘴廣東道嘅H&M分店，高叫「新疆棉花頂呱呱」，又話H&M試圖打壓新疆棉花產業，話新疆存在強迫勞動等指控係子虛烏有[3][5]。
不過，佢哋當時嘅行動就違反咗政府就武漢肺炎疫情而實施嘅限聚令。佢哋嘅成員亦被影到，穿着Adidas、Nike等同樣宣布停用新疆棉嘅品牌嘅產品。在場保安同警察交涉嘅時候，警察都形容同心會抗議人士只係玩一陣。警察亦未有就抗議人士違反限聚令執法，有啲媒體就批評警察有雙重標準執法之嫌[5]。
暴力騷擾2020年立會選舉民主派初選活動 編輯
喺2020年7月初，民主派就原定9月進行嘅立法會選舉進行初選，好多候選人都四出拉票。不過，民主黨立法會議員林卓廷，7月7號喺上水擺設街站宣傳初選，呼籲市民投票嘅時候，就遭到至少30名香港同心會嘅成員滋擾，呢啲人恐嚇林卓廷嘅義工，話「個場係我哋」，要求佢哋離開，佢哋甚至撕毁民主派嘅宣傳物品。義工曾經報警要求協助，但警察就話，之前已經有警員在場觀察，認為「一切平靜」。林卓廷事後話，而家報警求助嘅效用已經唔大[6]。
參考 編輯
- ↑ 1.0 1.1 1.2 1.3 〈藍絲闖港大｜「香江同心會」搗亂港大 藍絲斥犯法：相信警察會公平執法 ｜ 蘋果日報〉. 《Apple Daily 蘋果日報》 (香港中文). 原著喺2021-06-21歸檔. 喺2021-03-30搵到.
- ↑ 〈【莊思明公審空姐】莊思敏代妹道歉 賴網民激進言論令事件發酵 ｜ 蘋果日報〉. 《Apple Daily 蘋果日報》 (香港中文). 喺2021-03-30搵到.
{{cite web}}: CS1 maint: url-status (link) - ↑ 3.0 3.1 〈香港同心會斥H&M霸凌行徑 到尖沙咀分店抗議促道歉 - RTHK〉. news.rthk.hk (臺灣中文). 喺2021-03-30搵到.
- ↑ 〈團體闖港大 撕連儂牆反修例宣傳品〉. 《on.cc東網》 (香港中文). 喺2021-03-30搵到.
- ↑ 5.0 5.1 〈天下圍中︱藍絲戴國旗口罩尖嘴H&M踩場 着住Adidas叫抵制辱華品牌 ｜ 蘋果日報〉. 《Apple Daily 蘋果日報》 (香港中文). 原著喺2021-03-28歸檔. 喺2021-03-30搵到.
- ↑ 〈【立法會選舉】逾30藍絲有恃無恐 撕毁民主派候選人街站宣傳品 ｜ 蘋果日報〉. 《Apple Daily 蘋果日報》 (香港中文). 原著喺2021-03-31歸檔. 喺2021-03-30搵到.