一孩政策

一孩政策，曾經係中華人民共和國嘅計劃生育政策，由1979年開始隨住改革開放一齊推行，規定中國大陸嘅城市人只可以生一個仔女，生第二個就要審核批准，如果違反規定生第二個，需要交罰款（「社會撫養費」）。例外嘅就只係農村人、少數民族或者兩公婆都係獨仔獨女。

中國大陸地方政府宣傳一孩政策時用嘅標語

呢項政策雖然控制到中國大陸嘅人口增長，但亦都帶嚟唔少問題，例如強制避孕、強制墮胎同虐殺女嬰等。而一孩政策下出世嘅一代，冇兄弟姊妹，大陸人叫佢哋做「小皇帝」（即係皇帝仔）。

2013年11月中國共產黨十八屆三中全會開完之後進一步放寬爾個限制，而今衹要求兩公婆其中一方係獨仔獨女，俗稱「單獨二胎」。部分地方例如北京同天津規定可以單獨二胎，但係兩胎中間至少要隔四年。

2015年10月29號，中共透過中共中央十八屆五中全會宣布全面放棄一孩政策，實施普遍二孩政策，喺中國大陸實行卅幾年嘅一孩政策成為歷史。