三百洞

三百洞（粵拼：saam1 baak3 dung6）係中國廣東省廣州市嘅一個景區，喺2002年由從化政府投資開發成渡假村，位置喺從化太平鎮神崗，105國道嘅K2504+400標記位置嘅路口入去5km路程。

三百洞群山當中最高嘅大尖峯海拔達到603米，重高過廣州市區最高嘅帽峯山。

史

1938年10月因廣州淪陷，國民黨廣東省黨、政、軍、民、文等機構向北撤到韶關，從化變成粵北抗戰最前線。1938年夏，喺從化縣抗日動員委員會搞嘅中共地下黨員郭漢、雷亢清接受咗中共廣東省委關於充分利用各種合法形式，組織人民抗日武裝嘅指示，從化同廣州一齊淪陷埋，加上好多人睇到嗮班日軍做嘅衰嘢，嗰時日軍侵華總司令岡村寧次同廣州指揮官田中久一，猛咁搞三光政策，將中國嘅抗日根據地搞到連渣都冇得淨。

1939年4月6號，日軍104師團阪垣旅團嘅其一加強大隊從神崗嚟到流溪河北邊河邊，喺馬騮山同中國守軍157師938團第二營一齊鬥，從05:00（UTC+8）打到15:00（UTC+8），令日軍死傷400幾人，重將中村軍長殺埋，攞咗好多同日軍有關嘅機槍、步槍同軍用物資。但中國軍團死傷40幾人。

1939年4月7號，日軍大部隊到神崗作戰時，當地村民冚唪唥走嗮山上匿埋，做漢奸啲人帶日軍上嚟時，日軍指揮官發現山勢好高，山峰又多，入面好多凹地，好似啲窿噉，以為有好多山窿。結果指揮官問漢奸，話部分中國守軍同村民物資㔷埋嗮邊。漢奸覺得村民同部分中國守軍喺山頂好暗地區入面，加上有海拔600米制高點，出於驚死嘅心態，就向日軍指揮官話喺山入面啲山窿度匿埋咗。日軍問有幾多個山洞同人響窿入面，漢奸趁機誇張噉話山上有300個窿，個個窿有卅戶人家，日軍聽咗之後好驚，即刻掉頭返到路口繼續向從化方向走。後嚟村民覺得嚿地係風水福地，救咗好多人，為咗紀念抗日歷史同風水寶地，個村改名做三百洞村。

生態度假區喺1997年之前係廣州北郊分局，1997年，從化市教育局（今日嘅從化區教育局）接管後將北郊分局投資改裝過，起成度假村，工程喺2002年搞掂。由於所在地係三百洞村，加上紀念抗日歷史同風水寶地，所以改名做「三百洞生態度假區」，重加埋「三百洞森林度假村」個名。嗰時放哨用嘅消息樹同準備打日軍啲碉堡，喺2001同2005年俾廣州市公路管理局北郊分局改成三百洞森林度假村嘅定向燈塔同森林拓展探險嘅八角碉樓。

2008年9月4號，有遊客喺公園發現咗極危生物——桃花水母。

連出去

• 从化三百洞的历史 广州文史
• 三百洞的名字由来及抗日史 新浪博客 （2007-09-15）

出面網頁

• 三百洞生态度假区官方网站