不一致嘅謬誤

不一致嘅謬誤（英文：fallacy of inconsistency）係一種非形式謬誤，係指宣稱嘅命題自相矛盾而缺乏說服力嘅情況。

分類

不一致嘅謬誤又可以分成唔同嘅類別。

• 自我衝突：所謂自我衝突，係指宣稱嘅命題唔可以全部都係真。好似「自相矛盾」嘅故仔咁：「呢支矛可以刺穿全天下嘅盾」「呢個盾可以抵禦全天下嘅矛」，即係呢支矛可以刺穿世界上所有嘅盾並且又唔可以，就係犯咗自相矛盾嘅謬誤。如果呢啲命題都係用作論證嘅前提，可以叫做矛盾嘅前提（Contradictory Premises）。
• 自我推翻：所謂自我推翻，係指對某命題嘅肯定，加上一般嘅知識常識或者論者嘅言行，就反過嚟推理出對個命題嘅否定。例如「我講嘅説話都係假嘅」「我一句中文都唔識講」「呢件係低級嘅事，我唔想評論」。