不等號係代表左邊數值唔等如右邊數值嘅數學符號，用兩條平行橫線再加條右上到左下嘅斜線（≠）表示，有時寫做 NEQ。
喺程式編寫，礙於以前電腦用嘅內碼一般都表示唔到 ≠，多數會用其他方法表示不等號，唯一例外係 APL。現時用嘅高階編程語言，常見嘅例如有 C 語系（同被 C 影響嘅其他語言）用 !=[註 1]，Pascal、BASIC[註 2] 用 <>，仲有其他寫法，亦有啲語言係唔同資料類型會唔同寫法，唔可以一概而論。
