世嘉Saturn
世嘉Saturn（日文：セガサターン，英文：Sega Saturn，簡稱「SS」）係日本世嘉一部用CD-ROM嘅32-bit遊戲機。因為係世嘉第六部家用遊戲機，所以用太陽系第六粒行星——土星做名。世嘉Saturn係喺1994年11月22日開始喺日本發售，定價係44800日圓。喺北美同歐洲就分別喺1995年5月11日同7月8日發售。Saturn係雙CPU架構，加埋總共有8粒處理器，但係咁複雜嘅硬件令到開發有唔少困難。
Saturn最初喺日本幾成功，第一日就賣出17萬部。但係喺北美市場就唔係咁成功喇，喺任天堂64推出之後，Saturn嘅市場佔有率就大幅下滑。最後Saturn喺1998年就停產，而佢喺日本嘅銷量只係得580萬部，全球計都只係得926萬部，所以普遍嚟講都視Saturn係一部失敗嘅主機。世嘉無喺Saturn推出超音鼠嘅正統續作，被認為係失敗嘅原因之一。另外，世嘉喺歐美為咗保住Sega 32X，而對Saturn嘅宣傳唔嗲唔吊；同埋世嘉喺只係推出短短嘅4年就放棄Saturn改為發展Dreamcast，都係導致失敗嘅原因。
Saturn嘅評價主要都係好壞參半。雖然佢有唔少好遊戲，例如飛天幽夢、飛龍騎士系列、Virtua Fighter系列等，但係都有唔少嘅負評，例如話硬件設計複雜，無乜第三方嘅遊戲咁。
世嘉三四郎 編輯
1997年到1998年期間，為咗宣傳Saturn，世嘉請咗初代幪面超人嘅演員藤岡弘飾演世嘉三四郎，拍咗一系列嘅廣告。由於廣告大受歡迎，世嘉唔單止出咗兩個由世嘉三四郎做主角嘅遊戲，更加出埋廣告歌嘅CD，而CD重賣出咗超過十萬張。
睇埋 編輯
