中世日文

中世日文（日文：中世日本語／ちゅうせいにほんご ／ Chūsei nihongo）係中古日文（日文：中古日本語／ちゅうこにほんご）同近世日文（日文：近世日本語／きんせいにほんご）之間嘅日文語言發展階段，係12世紀到16世紀之間嘅500年裏面用嘅日文。喺呢個時期日文，中古日文嘅好多特徵都消失咗，日文嘅語言發展向住現代日文過渡。再細分落去，中世日文可以分成前期同埋後期：前期中世日文大約相當於平安時代尾嘅院政期到鎌倉時代所通行嘅日文，而後期中世日文大約係室町時代嘅日文。