亞歷山大四世 (馬其頓)

亞歷山大四世（希臘語：Aλέξανδρος Aιγός；公元前323年—前309年）係馬其頓亞歷山大大帝同巴克特里亞公主羅珊娜所生嘅仔，亦係阿吉德王朝最後一個國王。

亞歷山大四世
亞歷山大四世
出世	前323年8月 馬其頓
死	前309年 馬其頓
職業	馬其頓國王

出生

亞歷山大喺前323年死嗰時羅珊娜重有身孕，重未知嬰兒性別，馬其頓軍隊對繼承次序意見出現分歧。重裝備步兵（hoplite）支持由嬰兒嘅阿叔腓力──一個既有癲癇症又心智唔正常嘅人──做國王，而千夫長兼近衛裝甲騎兵（希臘文：Εταίροι）司令帕廸卡遊說佢哋等嬰兒生出嚟，希望羅珊娜生嘅係仔。於是各派系達成協議，決定由帕廸卡暫時做住攝政王而腓力就做個有名無實嘅國王，若果羅珊娜生嘅係仔，佢就生而為王。亞歷山大四世喺前323年8月出世。

攝政

前320年，帕廸卡喺領兵攻打埃及失敗之後，俾自己嘅將領暗殺。安提帕特喺特里帕拉迪蘇斯分封協議中被任命為新嘅攝政王。佢帶住羅珊娜同兩個皇帝返馬其頓，亦唔當自己係亞歷山大帝國嘅統治者，佢任由各省督（繼業者）統治埃及同亞洲各前行省。喺前319年安提帕特臨死前，佢將攝政王個位傳畀波利伯孔而唔係自己嘅親生仔卡山德。

內戰

卡山德當然係唔服氣，佢於是聯同托勒密一世、安提柯一世同國王腓力三世極有野心嘅老婆歐里狄克三世一齊向波利伯孔宣戰。波利伯孔就同攸美尼斯、奧林匹亞聯手應付。

前318年，安提柯摧毀咗波利伯孔嘅艦隊，馬其頓終於落入卡山德手中，波利伯孔被逼帶住羅珊娜同小亞歷山大逃去伊庇魯斯。幾個月後，奧林匹亞說服到佢親戚伊庇魯斯國王（Aeacides）同波利佰孔一齊進攻馬其頓。當奧林匹亞來到戰場，歐里狄克嘅軍隊唔肯同亞歷山大阿媽作戰，因而背叛歐里狄克。之後，波利伯孔又再奪得馬其頓。腓力同歐里狄克被虜而且喺前317年被處決，亞歷山大四世成為唯一嘅國王、而奧林匹亞實質上係亞歷山大嘅攝政王。

卡山德喺第二年（前316年）返馬其頓，亦再一次征服馬其頓。奧林匹亞即刻被處決，而國王同王太后就喺格勞西亞斯（Glaucias）嘅監守下被囚禁喺安菲波利斯（Amphipolis）嘅一座城堡。前311年，當卡山德、安提柯、托勒密同埋利西馬科斯喺大致平靜之下結束第三次繼業者之戰，佢哋之間嘅和約承認亞歷山大四世嘅權利同埋明確聲明佢會喺成年之後繼承卡山德成為統治者。

逝世

隨著和約之後，阿吉德王朝嘅支持者聲稱亞歷山大四世應該馬上當權，而唔再需要攝政王。卡山德嘅反應係關鍵性嘅：為咗維持自己嘅統治，佢喺前309年密令格勞西亞斯毒殺只得十三歲嘅亞歷山大四世同羅珊娜。

參考

• 《Dictionary of Greek and Roman Biography and Mythology》"Alexander IV"威廉史密夫編 波士頓（1867）

亞歷山大四世 (馬其頓) 阿吉德王朝 出世：前323年過身：前309年
上一任 腓力三世	馬其頓國王 前323年–前309年	下一任 卡山德
	波斯王 前323年–前309年	下一任 塞琉古一世
	法老王 前323年–前309年	下一任 托勒密一世