亞蘭冷衫
亞蘭冷衫（愛爾蘭蓋爾文：Geansaí Árann）係愛爾蘭亞蘭群島出產嘅一種冷衫。伊種冷衫最大嘅特點，就係用各種複雜嘅花紋，來區分著衫人嘅家族，一個家族祇有一種花紋，而且唔會有兩個家族嘅花紋相同。
傳統嘅亞蘭冷衫係用浸過蠟嘅羊毛織出來嘅，因為羊毛浸過蠟就唔會濕水，落雨或者返風浪嘅時候都可以著，啱晒西海岸啲漁夫打漁嗰陣時著。以前祇有漁夫嘅老婆會織亞蘭冷衫，但係宜家越來越多當地嘅手工藝人開始織亞蘭冷衫，然後拿去大亞蘭島上面嘅亞蘭冷衫市場道賣。另外，以前啲亞蘭冷衫完全係人手織嘅，但係宜家為咗適應市場需求，手工藝人開始用織布機幫手。雖然係咁，但係亞蘭冷衫市場重會為完全用人手織嘅亞蘭冷衫出一份《質量證書》。另外亦都有機械化工廠織出來嘅亞蘭冷衫，但係伊啲冷衫唔防水，花紋亦都簡單好多，因為太過複雜嘅花紋機械織唔出來。