交通事務局

交通事務局（葡文：Direcção dos Serviços para os Assuntos de Tráfego, DSAT）係澳門運輸範疇嘅部門，根據第3/2008號行政法規，喺2008年5月13號成立。呢個局主要負責研究、規劃、推廣兼做埋陸路運輸政策，整治道路，管理車輛，同埋設定、維修、優化交通同行人基礎建設。

交通事務局 Direcção dos Serviços para os Assuntos de Tráfego（葡萄牙語）
澳門政府機構
交通事務局標誌
局長	林衍新
副局長	鄭岳威
部門資訊
部門性質	一般部門
成立年份	2008年5月13號
所屬部門	運輸工務司
總部	馬交石炮台馬路33號
聯絡資訊
網站	交通事務局

成立源由

自2002年澳門當局開放咗賭權後，喺幾年間交通擠塞嘅情況越殷越嚴重。澳門政府為咗針對呢啲情況，喺2007年10月1號實行道路交通法；喺實行下，發現冇專門管理同做嘢嘅部門，搞到交通警員嘅工作係咁增加，而土地工務運輸局運輸廳同民政總署嘅範疇都有管到路政同交通嘅事，為咗統一管理，提升部門做嘢效率，澳門政府宣布會喺2008年年初成立交通事務局以配合澳門嘅交通事務發展。

機構設置

交通事務局人手編制有160人，由一名局長同兩名副局長領導下面各個機構：

• 交通規劃及建設廳
• 交通管理廳
• 車輛及駕駛員事務廳
• 行政及財政處
• 組織及資訊處
• 法律輔助處
• 公共關係處

職責

• 參與訂定、落實同評估對於陸路運輸業嘅政策；
• 持續規劃、推廣同評估陸路運輸系統嘅發展，並且確保同其他運輸模式嘅協調同銜接；
• 規劃、建議同協調馬路網絡、公共泊車設施、行車天橋同隧道等人行同交通基礎設施嘅興建同優化工作；
• 推廣研究工作同落實陸路運輸方面嘅嶄新方案，尤其係智能運輸系統；
• 開展交通安排嘅研究，並且確保車輛同行人交通安全同埋暢通建議一定要做嘅措施；
• 研究、跟進同協調跨境交通安排；
• 推廣預防交通事故同埋交通安全嘅教育；
• 規劃並且管理口岸嘅交通基礎設施；
• 監察道路網絡系統嘅運作，並且研究同引入新嘅系統；
• 監察供公眾使用嘅停車場同公共道路收費泊車位嘅運作，並且監督有關嘅經營活動；
• 監察陸路客運尤其係集體運輸業務嘅活動，並且評估佢嘅服務素質；
• 檢驗機動車輛；
• 發出駕駛學校牌照、駕駛學校校長同教練員嘅牌照，監察有關業務，並且更新有關紀錄；
• 發出學習駕駛牌照、駕駛執照、特別駕駛執照同特別駕駛許可證，並且更新有關檔案同駕駛員紀錄；
• 發出國際駕駛牌照；
• 發出的士司機專業工作證同埋幫佢續期，兼且檢驗的士同埋佢嘅咪錶；
• 發出的士執照，並且監察有關營業情況；
• 幫車發牌，並且發出呢部車識別文件同已經畀咗錢嘅車輛使用牌照稅同證明標籤；
• 實施馬路重整工程同其他工程，以改善交通運作、加強預防交通事故同交通安全；
• 就實施有礙車輛或者人正常行走嘅工程發出批準；
• 就使用公共道路而阻住車輛或者人正常行走發出批準；
• 設置、維修同保養馬路上嘅標記、交通標誌牌、訊息標誌同交通燈；
• 就可能對於陸路運輸造成較大影響嘅建設發展項目提出意見；
• 協調大型活動舉行時嘅交通安排；
• 接收、跟進同處理有關交通事務嘅建議同投訴；
• 研究並且建議喺自己職責範圍內嘅規範性、技術性同行政性措施；
• 監控無鉛汽油嘅質量；
• 提出喺自己職責範圍內嘅法規草案；
• 同治安警察局合作，移走違例泊車、阻住公眾行走或者棄置喺公共道路嘅車輛；
• 協助喺馬路上嘅司機遵守交通法規，並且記錄有關犯法嘅事；
• 實施法律賦予佢其他職責。

出面網頁

• （繁體中文）交通事務局