伍立德

伍立德（英文：Luther Ng)，香港電台電視部編導、記者，做過香港記者協會執委。

背景

伍立德喺一個香港基層家庭長大。佢阿爺喺香港開埠初期從廣東搬去香港西環南打工。阿爸喺戰前喺香港出世，做文員。阿媽係一個縫盤女工，經歷過歷石硤尾大火。伍立德細個住鑽石山木屋同深水埗板間房。伍立德喺2008年香港電台新聞部報道政府第一期《活化歷史建築伙伴計劃》接受訪問嘅時候，講佢細過喺好出名嘅古蹟雷生春住過八年。聽講因爲佢屋企窮，所以屋主雷亮後人俾佢哋入住嗰座唐樓，唔收佢哋租。

伍立德先後入讀循道學校、循道中學、中華基督教會基元中學（同演員萬綺雯同屆），之後到澳洲墨爾本升讀高中。佢喺澳洲皇家墨爾本理工大學傳理系畢業，主修電視電影及政治。之後返香港，喺亞洲電視做過嘢，然後去香港大學社工系修讀碩士。當時佢嘅系主任係後來做咗香港特區政府勞工及福利局局長嘅羅致光。1998年開始喺香港電台電視部做，擔任記者同編導，拍攝紀錄片同專題。

採訪六一三被襲

2014年6月13號，伍立德到立法會採訪反新界東北撥款示威，夜晚八點影到好多個幪面人破壞立法會大樓。6月14號凌晨，佢喺立法會示威區採訪留守人士嘅靜坐，佢哋以大學生為主。期間懷疑因爲伍立德影到警方武力清場，有七個警察用武力襲擊伍立德，然後抬佢走。事後屬政府部門嘅香港電台罕有發表聲明，譴責亦係政府部門嘅警方以粗暴手法對待香港電台前線人員進行正常採訪，表示強烈不滿。

根據明報文章，伍立德表示當時佢「未被查問一句就被警員押走」，「中咗好多拳」。文章描述警察以「撒謊形式執法」。指揮官當晚命令手下「移走」佢，佢未有任何反應，就被幾個警員衝上前話：「先生，你好激動呀！你好激動呀！」之後係拳來如雨。伍立德喺文章度講，「後來，我訪問過幾個613示威者，佢哋都有類似遭遇，先被硬指情緒激動，再俾人拳打。呢個似乎唔係巧合個別警員應對，而係越嚟越普遍嘅統一手法。究竟喺咪警察學院訓練嘅一部分？定係上層的指示？警方需要認真交代。」

伍立德曾公開表示，事件亦令佢積極參與香港記者協會新聞自由工作。佢做過香港記者協會執委（2015-2016 及 2016-2017）。

電影《對倒》

2016年9月伍立德為籌備及拍攝電影《對倒》而暫別香港電台，拍攝完之後返咗去電視台做嘢。電影喺2018年公映。