低滲溶液（英文Hypotonic solution）即係溶液嘅水潛能高過細胞，咁樣，水嘅淨流向（net movement）就會從溶液進入細胞裏面。注意水係有出有入嘅，在淨移動中，入水多過出水。
處於低滲溶液嘅細胞，會不停入水直至內外水潛能一樣。有時呢啲細胞會入太多水結果爆開，呢個情況通常出現喺動物細胞度。例如紅血球放咗喺低滲溶液之後爆開，血紅蛋白離開咗紅血球入咗血，又叫溶血現象。
而植物細胞因為有細胞壁嘅緣故，唔會爆開，只係會膨脹。植物細胞吸水膨脹會畀到植物支撑，尤其係草本嘅植物。
