佐敦

佐敦（粵拼：zo3 deon1 ，英文：Jordan）係香港地鐵佐敦站附近嘅地方，介乎油麻地、尖沙嘴、京士柏之間。呢一帶原本叫官涌，但因為1979年佐敦站啟用，佐敦慢慢變成地名。佐敦地方行政上歸油尖旺區。佐敦唔同人有唔同定義，分歧好大。

佐敦全景

名

佐敦由地鐵佐敦站而名，而佐敦站以佐敦道而名。而佐敦道原本叫第六街，因病理學家兼醫生佐敦（Gregory Paul Jordan）抗鼠疫有功而改做佢嘅名。佐敦亦做過香港政府嘅衞生官同香港大學校長。

行政

佐敦喺2007年油尖旺區議會選舉來講，分做東西兩區，範圍包括埋官涌同渡船角，同渡船角對出嘅西九龍新填地。

邊界東起加士居道同佐敦道交界，沿佐敦道西南行到覺士道，覺士道南行到柯士甸道，柯士甸道西行到廣東道，廣東道北上到佐敦道，佐敦道西行至新油麻地避風塘，沿海皮北上，喺海寶道中段向西打橫拉條綫到翱翔街同海泓道交界，海泓道南行，屈東入欣翔道，欣翔道東行接甘肅街，再東行接加士居道，再東南行遇佐敦道為止。

事件

武漢肺炎香港疫情嗰陣，佐敦嗰頭喺2021年1月有大規模社區爆發，當局將嗰一區圍封成「受限區域」，出面嘅人唔畀入去，而入面嘅人就一定要做強制檢測，出咗結果後先至畀走。