你 (時代年度風雲人物)

「你」響2006年獲選為時代雜誌嘅年度風雲人物。《時代》將「你」選為年度風雲人物，原因係數以百萬計嘅人喺維基百科、YouTube、MySpace、Facebook等等嘅Web 2.0網站上面匿名貢獻咗大量內容。

背景

響過往嘅「年度風雲人物」入面，大部份嘅獲選人物都係歷史上嘅重要人物，亦都有一部份係代表一類人嘅稱號（例如1993年嘅「和平締造者」），而極少數係無生命嘅物件（例如1982年嘅個人電腦同1988年瀕危嘅地球）。

部份同年度風雲人物類似嘅媒體獎項都承認咗網路社群同用戶生成內容日趨重要嘅地位，例如《商業2.0》（Business 2.0）喺2006年7月將「你！」擺響「影響依家嘅50人」第一位，美國廣播公司新聞亦都響2004年將網誌作者列為「年度人物」。

決擇

響2006年，按照《時代》嘅程序，唔同新聞部門都需要提名「年度風雲人物」。喺11月，「你」同「YouTube班友」（the YouTube guys）脫穎而出。隨後，《時代》響網上收集讀者嘅意見，並交畀總編輯理查德·斯坦格爾做最終決定。

喺2006年12月13日，《時代》宣佈獲選者，即係「你」。

批評

呢個決擇其中一個批評者保羅·科德羅斯基話佢係「令人難以置信，逃避現實嘅做法」。彼得·薩加爾更加指出「如果『我哋』真係控制到媒體，我哋會選一個更好嘅年度風雲人物」。

另外，《時代》曾經響網上收集讀者嘅意見，結果顯示烏戈·查韋斯獲得最多人支持，佔總票數嘅35%，而馬哈茂德·艾哈邁迪內賈德就係第二名。然而，《時代》無視呢尐結果，所以有人批評《時代》唔民主；《時代》回應話，網上投票無科研價值，因此無理到結果，而網上投票嘅結果亦都被移除。