保衛藏語運動

2010年保衛藏語遊行發生喺2010年10月中下旬，青海同埋甘肅嘅部份藏族學生爲抗議官方輕視藏語教育嘅地位，而抗議示威。

背景

中華人民共和國政府喺藏區內嘅教育政策度，話就話實行「以漢語爲主、藏語爲輔」嘅雙語教學，但係好多學校限制喺校園入面用藏語，噉做令部份藏民對藏語喺政府教育政策嘅地位低下表示不滿。

2010年7月左右，廣州市發生咗撐粵語事件。部份市民因爲粵語喺廣州嘅地位被逐漸削弱而上街抗議。

而青海省教育廳喺新制定嘅教學政策中要求「中學入面除咗藏文同英文之外嘅所有科目，都變成漢語教學，藏族學生亦都被要求用漢語嚟答問題」，噉做亦被認爲係呢次事件嘅導火線^[1]。

2010年10月19號，青海省黃南藏族自治州同仁縣幾千個中學生上街示威。10月20號，青海省海南藏族自治州共和縣四間學校過千個學生示威。10月21號，青海省果洛藏族自治州瑪沁縣藏族學生抗議示威。10月23號，北京中央民族大學過百個藏族學生喺校內抗議。之後甘肅省甘南藏族自治州夏河縣扎油鄉小學過百個學生10月25號喺當地寺院示威，然後10月27號嗰間學校200個師生再次示威。

據稱喺青海嘅黃南、海南、海北、果洛四個藏族自治區中，共有近8000個學生抗議示威^[2]。

10月29號，青海省人民政府聲稱呢啲事件係藏人對青海嘅教育政策上有誤解，重申「加強同改進『雙語』教育工作嘅指導思想同基本原則係完全正確嘅」同「國家喺推廣普通話同規範漢字嘅同時，亦都充份尊重同保護少數民族使用本民族語言文字嘅權利」^[3]。