俾鬼附身又盲又啞嘅人

俾鬼附身又盲又啞嘅人係《聖經》記載耶穌趕鬼嘅神蹟之一，喺《馬太福音》、《馬可福音》同《路加福音》都有記載。

聖經譯文

「	當時，有人將一個俾鬼附身、又盲又啞嘅人帶嚟耶穌面前，耶穌就醫好佢，令到佢可以講到嘢，又睇得見。群眾都驚奇，話：「呢個唔係大衛嘅子孫咩？」但係法利賽人聽見，就話：「呢個人趕鬼，只係靠住鬼王別西卜啫。」耶穌知道佢哋諗緊乜，就對佢哋話：「凡一國自相紛爭，就成為荒場；一城一家自相紛爭，就企唔穩；若果撒但趕逐撒但，就係自相紛爭，佢嘅國點能夠企得穩呢？我若果靠住別西卜趕鬼，你哋嘅子弟趕鬼又係靠邊個呢？噉樣，佢哋就要斷定你哋嘅是非。若果我靠住上帝嘅靈趕鬼，噉就係上帝嘅國臨到你哋喇。人點樣能夠進入武士屋企，搶奪佢嘅財物呢？除非先綁住嗰個武士，先可以搶奪佢嘅財物。唔同我相合嘅，就係敵對我嘅；唔同我收聚嘅，就係分散嘅。」所以我話你哋知：「人一切嘅罪同所講褻瀆嘅嘢都可以得到赦免，惟獨褻瀆聖靈，總得唔到赦免。凡講嘅嘢干犯人子嘅，重可以得到赦免；惟獨講嘅嘢干犯聖靈嘅，今世來世總係得唔到赦免。」	」
——《馬太福音》12章22-32節

「	耶穌入咗一間屋，群眾又聚集，甚至佢連食飯嘅時間都冇。耶穌嘅親屬聽見，就出嚟要拉住佢，因為佢哋話佢癲咗。喺耶路撒冷落嚟嘅文士話：「佢係俾別西卜附住」；又話：「佢係靠住鬼王趕鬼。」耶穌叫佢哋嚟，用比喻對佢哋話：「撒但點能夠趕出撒但呢？若果一國自相紛爭，嗰個國就企唔穩；若果一家自相紛爭，嗰家就企唔穩。若果撒但自相攻打紛爭，佢就企唔穩，就要滅亡。冇人能夠進入武士屋企，搶奪佢嘅財物；一定要先綁嗰個武士，先可以搶奪佢屋企嘅財物。我實在話知你哋知，世人一切嘅罪同一切褻瀆嘅話語都可以得到赦免；凡褻瀆聖靈嘅，就永遠得唔到赦免，乃要擔當永遠嘅罪。」耶穌講呢啲嘢係因為佢哋話：「佢係俾污鬼附住嘅。」	」
——《馬可福音》3章20-30節

「	耶穌趕出一個令人啞嘅鬼；鬼出咗去，嗰個人就講到嘢；群眾都驚奇。裏面卻有人話：「佢係靠住鬼王別西卜趕鬼。」又有人試探耶穌，向佢求從天上嚟嘅神蹟。耶穌知道佢哋諗緊乜，就對佢哋話：「凡一國自相紛爭，就成為荒場；凡一家自相紛爭，就必敗落。若果撒但自相紛爭，佢嘅國點能夠企得穩呢？因為你哋話我係靠住別西卜趕鬼。我若果係靠住別西卜趕鬼，你哋嘅子弟趕鬼又靠邊個呢？噉樣，佢就要斷定你哋嘅是非。我若係靠住上帝嘅能力趕鬼，噉就係上帝嘅國臨到你哋喇。一個裝備整齊嘅武士看守住自己嘅屋企，佢所有嘅都平安無事；但係有一個比佢更強壯嘅嚟，制伏咗佢，就將佢所倚靠嘅盔甲兵器搶走，又分佢嘅贓物。唔同我相合嘅，就係敵對我嘅；唔同我收聚嘅，就是分散嘅。」	」
——《路加福音》11章14-23節

概覽

群眾睇見耶穌所行嘅神蹟，係超出人能力嘅範圍。因為佢醫好一個俾鬼附身，又盲又啞嘅人，四圍睇見嘅人都覺得驚訝噉話：「呢個唔係大衛嘅子孫咩？」意思即係能夠醫好呢個病症，只有彌賽亞救世主先有噉嘅大能。耶穌醫好呢個病人，卻引起法利賽人嘅惡意評擊。佢哋故意眨低耶穌嘅能力，硬指耶穌係靠鬼王嘅力量趕鬼，耶穌反駁佢哋話：「如果我係靠鬼王趕鬼，噉樣喺鬼嘅世界裏面唔通要自相毀壞？真係荒謬嘅論調。其次，假如我係靠鬼王嚟趕鬼，噉樣你哋嘅子弟趕鬼唔通更係靠鬼王趕鬼咩？」法利賽人嘅誣告，可以話係無理取鬧。繼而用武士嘅比喻嚟表達；人若果要搶奪武士屋企嘅財產，就一定要先要制服嗰個武士。又若果要趕逐鬼所纏身嘅人，一定要靠上帝嚟捆綁魔鬼。其實，法利賽人一早已經知道耶穌係靠著上帝嘅靈趕鬼，但係因為心裏面存有惡念，諗住借題陷害耶穌。法利賽人嘅行為係明知故犯，佢哋頂撞、譭謗、固執，正係犯咗唔可以赦免褻瀆聖靈嘅罪。呢種罪通常出自內心嘅惡念，正所謂「一生嘅果效由心發出」。善人從所積聚嘅善就發出善，惡人從所積聚嘅惡就發出惡。所謂「有諸於內形於外」，因此要保守我哋嘅心勝過保守一切。