八仙

  想搵第二個意思嘅話，請睇八仙 (搞清楚)。

八仙係道教既八位神仙，佢哋分別代表咗男、女、老、幼、貧、賤、富、貴呢八種唔同既人，分別係何仙姑、韓湘子、曹國舅、藍采和、漢鍾離、鐵拐李、呂洞賓、張果老，佢哋都係凡人得道成仙既凡人，性情、性格同埋造型都接近一般人，所以八仙喺民間好受尊崇，佢哋既故事亦都喺民間廣為流傳。

八仙過海圖，船尾數起：何仙姑、韓湘子、曹國舅、藍采和、漢鍾離、鐵拐李、呂洞賓。船外：張果老

八仙傳說既起源係西漢，喺淮南王劉安既《淮南子》後傳出劉安既八位門客都一齊成咗仙。

到咗唐代，唔少文人墨客都附會埋，喺詩人、畫家渲染之下，八仙故事就多咗幾分浪漫色彩，仙家人數亦大為增加，最出名既係李白、賀知章等八個好杯中物既詩人，後人叫佢哋做酒中八仙人。

我哋依家熟識既八仙，係明代既版本，係吳元泰既《東遊記》同埋湯顯祖既《邯鄲夢》裏面所講既八位神仙。呢八位分別係：男既代表呂岩（呂洞賓）、女既代表何瓊（何仙姑）、老既代表張果（張果老）、少既代表藍采和、貧既代表鍾離權（漢鍾離）、賤既代表李玄（鐵拐李）、富既代表韓湘（韓湘子）、貴既代表曹景休（曹國舅）。