八重山

八重山地圖

八重山（粵音：baat³ cung⁴ saan¹；琉球文：山（ヤマ yama），八重山話：石垣（イシカキ ishikaki）；日文：八重山列島 / 八重山諸島（やえやまれっとう / やえやましょとう Yaeyama marettō / Yaeyama shotō）），有時會喺後面加多箇詞做八重山群島，係日本沖繩縣嘅一處群島。呢度係離日本本土大島最遠嘅地方，日本最西嘅有人島與那國島、最南嘅有人島波照間島喺齊呢度。

呢處群島原本係琉球群島南邊嘅火山島。行政上，呢箇群島屬八重山郡，除咗石垣島之外。（此外日本宣稱釣魚臺列嶼歸入八重山嘅石垣市管轄）

名

1719年出版嘅《中山傳信錄》記載「八重山，一名北木山，土名彜師加紀，又名爺馬」。當時重好興用漢字寫音而非用假名，所謂「彜師加紀」，對應嘅日文音係いしかき（ishikaki），係八重山當地嘅琉球方言對本地嘅稱呼，琉球漢字寫法係「石垣」，而家日文將「石垣」呢箇名收窄、僅限石垣島一處而非成箇群島。而「爺馬」嘅日文音係やま（yama），係標準琉球語嘅地名稱呼，漢字寫法係「山」。「山」嘅意思就係「島」，類似嘅用例有廣東嘅萬山。

所謂八重山，係話離遠望過去，八座有人島（石垣島、竹富島、小濱島、黑島、新城島、西表島、鳩間島、波照間島）連成八重，所以叫八重山。

文化

與那國島嘅本地話係與那國話，呢箇島附近海域嘅海底有神祕嘅與那國島海底遺跡（Yonaguni monument）。與那國之外嘅群島講嘅係八重山話。呢度通用嘅日文係啲人嘅第二母語。