六格骨牌
六格骨牌（Hexomino），又叫六連塊，係一種多格骨牌，每塊以六個全等嘅正方形連成，反射或者旋轉視為同一種嘅話共有三十五種六格骨牌。
平面填充
編輯所有35種六格骨牌都滿足康威準則，因此都可以只用同一種六格骨牌嚟填滿成個平面。
雖然全部嘅六格骨牌一共有210格，但係並冇辦法將佢哋全部拼成一個大長方形（唔似五格骨牌，可以將全部十二種五格骨牌拼成3×20，4×15，5×12或6×10嘅長方形），原因類似唔可以肢解西洋棋盤問題嘅原因，因為如果將長方形同所有嘅六格骨牌都依照西洋棋盤嘅方式嚟著色，噉任何一個面積係210平方單位嘅長方形都會被塗成105個黑格同105個白格，但係所有嘅六格骨牌當中，除咗編號3、7、12、14、16、18、23、25、27、32、34呢十一種六格骨牌會被塗成4個黑格同2個白格（亦可以塗成2個黑格同4個白格），而其餘嘅廿四種六格骨牌都會被塗成3個黑格同3個白格，所以，呢三十五個六格骨牌所佔嘅黑格跟白格嘅總數一定都係偶數（11×偶數+24×奇數=偶數），但105係奇數，所以無可能做到。
但係，如果喺15×15嘅正方形中間挖走一個3×5嘅長方形，剩餘嘅部分就可以用全部嘅六格骨牌填滿，用肢解西洋棋盤問題解決嗰陣，黑格比白格嘅比例唔係105：105，而係106：104，承上，106同104都係偶數，所以可能做到。
正方體嘅展開圖
編輯呢三十五種六格骨牌當中，只有十一種（編號12、13、14、15、16、17、24、28、31、34、35）可以折成正方體。
正方體嘅展開圖無可能包含嘅五格骨牌有4種，分別係I、P、U、V。
 |