開主選單
2015年7月14號由新視野號所影嘅冥王星
藝術家筆下嘅冥王星同埋衛星卡戎。1930年被發現之後冥王星一直被當做行星,到2006年先至歸類做矮行星

冥王星粵拼ming5 wong4 sing1;拉丁文:Pluto),係最大嘅矮行星 ,學術上叫做134340號小行星,係喺太陽系入面嘅矮行星。喺2006年之前,佢係大部份時間離太陽最遠嘅行星。冥王星重細過月球,直徑2344公里左右,質量約莫係月球嘅五分之一。

佢比其他行星嘅軌道離心率高好多,特別斜,多數海王星近太陽多尐果時,冥王星就遠啲。不過冥王星近太陽果時,就啱啱相反。冥王星重細過某啲行星嘅衛星,之不過冥王星都有幾個衛星,最大嗰個叫卡戎(Charon),重有四個細嘅叫尼克斯(Nix)、許德拉(Hydra)、科伯羅司(Kerberos)同冥河(Styx)[1]

喺2015年7月14號,新視野號探測船飛近冥王星,成為第一艘飛過冥王星嘅飛船。[2]

發現史

喺1850年開始,發現咗海王星無耐,就有啲天文學家開始分析,推測海王星外面重有粒未知嘅行星響度,干擾住天王星嘅軌道。喺1905年,美國嘅天文學家羅威爾就諗住睇吓呢粒未知行星係點行,重出埋影相機嚟搵,不過佢一直都未搵到。

雖然羅威爾喺1916年死咗,但係佢起嘅羅威爾天文台就繼續探索緊未知行星,直到1930年2月18號,嗰時比較後生嘅湯博,喺查緊巡天嘅星球相嗰陣,發現咗呢粒新嘅行星。結果呢個星球按住天文學界嘅傳統,改咗做「冥王星」,即係「閻羅王嘅星球」噉解。

冥王星嘅地位爭議

初頭天文學家都以為冥王星嘅質量同地球差唔多,但後來出乎意料咁發現咗佢嘅質量其實好細。喺1978年,冥衛一俾天文學家發現咗,度到佢嘅質量得地球嘅0.2%,解釋唔到天王星軌道被干擾嘅問題,就開始有天文學家質疑冥王星喺咪真係一個行星嚟。

1999年有建議話將冥王星踢出行星之列,但嗰年國際天文聯合會(IAU)話唔得。但係,後嚟喺2006年8月24號晏晝舉行嘅第26屆國際天文聯合會入面通過咗呢個決議,個會由天文學家嚟投票決定,正式將冥王星降級為矮行星,踢咗出九大行星嘅範圍。喺2008年,國際天文聯合會就將冥王星加返入類冥矮行星嘅範圍。[3]但係,近年又有爭議,有科學家又想將冥王星列為行星。

睇埋