冰島議會

冰島議會（冰島文：Alþingi，直意係全體議會），係冰島嘅立法同議事機構，同時係世界上最早出現嘅議會之一，係到現代仲存在著嘅最古老嘅議會。

全體議會 Alþingi
冰島國徽
Logo 全體議會標誌
種類
種類	一院制
領導
議長	Steingrímur Jóhann Sigfússon（左翼－綠色運動） 由2016年10月29日
結構
議員	63
政黨	執政聯盟 （34） 　 左翼－綠色運動（10） 　 獨立黨 (冰島)（16） 　 進步黨 (冰島)（8） 在野黨（29） 　 改革黨（4） 　 中間黨（9） 　 海盜黨（6） 　 聯盟－冰島社會民主黨（7） 　 人民黨 (2) 　 獨立人士 (1)
選舉
上屆選舉	2017年10月28號
會議地點
Alþingishúsið Austurvöllur 冰島雷克雅未克
網址
www.althingi.is

最初嘅議會係930年喺辛格韋德利（冰島文：Thingvellir）嘅法律石度創立，此後因為冰島受到挪威同丹麥嘅殖民統治而喪失咗議事功能（淨係當法院咁用）。1944年冰島成為共和國後，議會就轉為政體嘅最高立法機構。

原採取兩院制，1991年後採取一院制，現共有63名議員，任期四年。

史

19世紀彩繪入邊位處辛克瓦萊峽谷嘅法律石

據喺12世紀初葉成書嘅冰島歷史文獻《冰島人之書》（冰島文：Íslendingabók）仲有《定居者之書》（冰島文：Landnámabók）嘅記載，喺「定居者時代」（The age of settlement），由870年去到930年，隨著冰島移民潮而定居嘅維京移民增加（總計有435人），傳統嘅武鬥方式經已唔再適宜解決族群嘅爭拗。借鑒返北歐氏族社會間一路有嘅成年男性聚會、商討重要議題嘅風俗，冰島嘅維京人就喺920年模仿挪威律法，制定咗冰島第一部法典《灰雁法典》（冰島文：Grágás）。跟著嘅930年仲揀咗雷克雅未克郊外嘅辛克瓦萊峽谷（冰島文：Þingvellir）召開咗第一次自由人大會。

跟著嘅會議固定每年一次，主要嘅工作就係制定法律、宣判刑事案件，一次會期係兩個禮拜。議會嘅活動一路係持續到1798年。呢個期間冰島喺1262年臣屬挪威，兩個地方到1380年再同歸丹麥管治。冰島議會呢段時間入邊，係慢慢失去咗立法權，而喺1800年俾人撤銷咗。

到咗1845年冰島議會作為丹麥國王嘅咨詢議會得以重建，1874年後又攞到咗部分立法權同財政權。1918年冰島同丹麥簽訂咗聯邦法，約定咗冰島升格做主權國家，但外交事務仲係由丹麥揸fit。到1944年6月16號丹麥聯盟宣佈解散咗，跟著第二日獨立後嘅冰島就頒布咗第一部憲法，宣告冰島共和國嘅成立，冰島議會就實施兩院制，每屆新議會會選出三分一議員組成上院，另外三分二就組成下院，舉行聯席會議就稱呼係聯合院。1991年10月上下兩院合併成一院。

早期特色

最初嘅議會最有標誌性嘅，就係位處巨大山壁嘅包圍，發言者可以企上議會石/法律石度，利用山壁嘅擴音效果，畀參會人都聽得清發言嘅說話。由於早期嘅維京人民風彪悍，即使進行著議會，都係時有發生流血衝突，或根據議會嘅仲裁進行處刑。

議會嘅誕生俾睇作係「冇國王嘅冰島」開始形成一個國家嘅象徵。喺呢個議會度任何人都可以控訴同調解，仲有議決。

盛況

每到冰島議會召開嘅時候，就係維京人社群度最鬧熱嘅場合。各「庭」（解釋睇下一章）嘅頭領，會帶埋屋企人同扈從一齊參會。由於會議有一種節日氣氛，商販、細路、詩人各色人等都會聚埋呢度。啲商人會帶返啲外埠嘅小道消息過去，會利用埋集會嘅機會賣嘢兜生意，仲會開埋商鋪。釀酒師仲會帶埋一桶桶酒，啲部族酋長會利用機會尋求新嘅聯盟，仲有締結友好嘅政治婚姻。 詩人同講古人會喺處娛樂啲民眾...成個氛圍就會好似嘉年華咁。

組成架構

最初議會所制訂嘅《灰雁法典》，就為古冰島各級權力機關嘅組成訂立咗一系列嘅規例。按照《法典》全島可劃分成多個「庭」（冰島文：goðorð），唔係一個確切嘅地理單位，而係一個統計固定數農民嘅計量單位，所以全島「庭」嘅總數會成日浮動嘅，一般係36個，有時就會係39或48個。每個「庭」會安置一個頭領（goðar / chieftain），由全島各頭領作為議員組成冰島議會。喺會議召集時，各頭領有權要求下屬嘅每9個自由民選派1人一同參會。主持嘅議長又稱「法律宣講人」（Lögsögumaður / Lawspeaker），由各頭領推選產生，任期三年，可連選連任；而議會入邊同樣會有頭領之間嘅改選，頭領任期亦係三年，可連選連任。

而議會入邊行使最高立法職能嘅係「立法會議」（Lögrétta / Law Council），由法律宣講人召集，每個頭領都有資格參會，仲可以帶兩名隨從。立法會議對公眾開放，所有感興趣嘅冰島人都可以旁聽。

現代

現代嘅冰島議會，每屆議會就會分4個年會，年會開始前啲議員就會抽籤決定自己嘅座位，而各黨議員係分開坐嘅。每個年會由10月1號開幕，到第年5月休會。有特殊情況嘅時候休會期間亦可召集會議。而議長同6名副議長會組成常務委員會（the Presidium），商討重大事務。經同內閣同議會黨團嘅商討，常務委員會先至會定返年會嘅主要日程。每禮拜嘅日程亦由常務委員會提出，交由議長一錘定音。現代議會啲會議亦保持對公眾開放，媒體可以全程報導。而議會黨團（Parliamentary Party Group）限定黨團成員至少有兩人，而每位議員唔可以隸屬超過1個以上嘅黨團，黨團可以選舉出1名主席。黨團通常每兩禮拜會聚會一次，商討、決定返啲成員喺議會各委員會、處理重要事務嘅分工，討論埋計劃提交議會嘅議題，審查各議會委員會嘅提案同埋提出修正案。

紀念相關

文學創作

古議會開嘅時候就似嘉年華咁，啲人都會藉機相互認識、相約、結盟或建立友誼。 議會開陣時亦係安排終生大事嘅絕佳時機，當地唔少浪漫嘅愛情故事據話都係由呢度開始。喺冰島最出色嘅中世紀文學作品尼亞爾薩迦（冰島文：Njáls saga）度，精細描繪咗冰島 960 年到 1020 年間嘅古仔，其中描述嘅冰島英雄人物 Gunnar 同佢太太，第一次相遇就係喺呢個議會場地嘅一帶。

保護同觀光

根據1928年通過嘅冰島法律，古議會原址所處嘅辛格維利爾，成為咗國家公園同國家保護區，將始終作為冰島嘅國家財產，由議會去負責保護。 2004年開始列入咗聯合國教科文組織嘅世界文化遺產名單。