分飛燕
粵文歌
《分飛燕》係一首經典粵語流行曲，屬於粵曲小調。蘇翁用廣東傳統古曲《楊翠喜》，填詞得來。初時唔係呢個名，叫做《囑咐話兒莫厭煩》。第一個唱嘅歌手，係甄秀儀同埋陳浩德，收錄响甄秀儀1973年香港發行嘅專輯《一切太美妙》（麗歌唱片/百代唱片，S-LRHX-001）入面。《分飛燕》响香港、廣東、東南亞等講粵語嘅地方都有好多人傳唱；日後有好多歌星翻唱過。
| 分飛燕（囑咐話兒莫厭煩） | |
|---|---|
| 甄秀儀、陳浩德嘅歌 | |
| 收錄喺專輯《一切太美妙》 | |
| 發行日期 | 1973年 |
| 類 | 粵語流行音樂 |
| 時長 | 03:00 |
| 唱片公司 | 麗歌唱片 |
| 作曲 | 佚名 |
| 編曲 | 黎小田 |
根據原唱歌手陳浩德回憶，嗰時香港嘅流行曲，大部份係唱英文，或者唱國語。粵語流行曲俾人話老土，地位低一截；但似乎都有市場。甄秀儀當時就已經出過幾張唱片，不過全部都係國語歌。佢想試出張粵語流行曲唱片，入面就有呢首歌。原本係甄秀儀獨唱，後來因為負責編曲同配樂嘅黎小田，同甄秀儀用電話溝通時搞錯個Key，錄音時先發覺唱唔到；臨時決定改做男女對唱，搵陳浩德唱男聲。[1]
《分飛燕》嘅風格，仍然有好重粵曲成份。曲本身就係傳統粵曲小調。詞嘅題才，亦係粵調常見嗰種歌女嘆分離。歌詞係文言為主，但冇用「哥、妹、君、卿」呢類咁隱晦暗嘅代語詞。用詞反而相當白話。冇套用典故，但亦冇用廣東話口語。用時代曲常用嘅西樂伴奏編曲；兩個歌手，亦唔係唱開大戲，係時代曲底。發行之後，好受歡迎。所以有人話，《分飛燕》係第一次香港人唱嘅廣東歌，嚮香港受各階層皆歡迎，擺脫當時粵語曲地位低過國語曲嘅諗法。呢首歌，係70年代粵語流行曲响香港開始大放異彩嘅先聲[2]。
70年代，有好多歌星翻唱《分飛燕》，仲係收入作品專輯嗰種；證明呢首歌幾多人鍾意。填詞人黎彼得1977年惡搞「分飛燕」，二次創作，將佢改成為《新區自嘆》。用抵死啜核地道嘅廣東口語，寫當時香港新區治安惡劣，由張武孝（大Al) 主唱。
參考
編輯- ↑ 〈陳浩德2017年6月專訪〉。《加拿大中文電台》。喺2020-04-28搵到。
- ↑ 黃志華 (2014-03-24)。〈顧嘉煇老三與老大之誤〉。信報。