利蘭獅子

利蘭獅子係英國利蘭出嘅一款前置引擎單層巴士底盤，1925年亮相，係利蘭頭幾款專門作巴士用途嘅車款之一。佢係歷嚟四款被命名為「獅子型」嘅利蘭巴士之中嘅第一款。

利蘭獅子 Leyland Lion
利蘭獅子PLSC1 利蘭獅子LT9 九巴嘅利蘭獅子
製造廠	利蘭
邊道出	英國
製造年份	1925年—1940年
後繼產品	利蘭Tiger PS1
規格
長	25呎至27呎半
引擎	利蘭汽油/柴油引擎
波箱	利蘭滑動嚙合/扭力轉換器

LSC系列

1920年代中，英國開始出現採用降低咗車陣嘅車型。有別於直身車陣、同貨車共用嘅舊設計，兩條車軸之間嘅大陣整得低咗，令車廂地台可以整低啲。利蘭獅子型底盤採用咗呢種底盤設計，司機位擺喺引擎右邊。汽油引擎係四汽缸設計，波箱係滑動嚙合式。佢一開始就已經用充氣車胎，同埋有得揀尾輪或者四輪制動，投產後冇耐四輪制動成為標準。

最初推出嘅利蘭獅子型可以配25呎長車身，軸距14呎半，車型代號LSC1（C係解淨載重3噸），亦曾經好短時間被稱為PLSC1（P係解載客用）。1927年，利蘭推出軸距加長到16呎5吋嘅獅子型，可以配27呎半長車身，車型代號LSC3（曾經好短時間被稱為PLSC3）。

獅子型LSC系列係利蘭同期五款巴士底盤之中，銷路比較好嘅一款，喺四年間出咗成三千幾架。

Leopard

喺獅子型LSC1推出嗰時，利蘭亦推出設計同獅子型相近，但軸距長過獅子型LSC1、載客量亦高啲嘅Leopard。型號初時訂為LSG（G係解淨載重4噸），最後被訂為PLSC2。Leopard淨係出咗兩架，喺1926年帶住利蘭車身賣咗去利物浦。

LT系列

1929年，利蘭修改咗獅子型嘅設計，成為新嘅LT系列。佢採用咗同利蘭Tiger相近嘅設計佈局，包括引擎波箱改成互相緊貼，傳動軸同埋尾軸嘅尾牙都安排喺底盤嘅偏左位置等等。最初生產嘅版本代號係LT1（軸距16呎7吋），1930年改良成LT2（軸距改短到同Tiger TS3一樣係16呎半），到1931年再改良成LT3（軸距同Tiger TS1一樣係17呎半），雖然三者軸距唔同，但車身全長都係27呎半。另外喺1932年，利蘭亦出過少量嘅獅子型LT4，主要畀愛爾蘭用。

同樣喺1932年，獅子型發展到LT5。佢條驅動軸入面條傳動軸由半浮動式改成全浮動式，傳動軸唔使再承受車身重量。真空輔助制動由單一伺服摩打改成分開三個，頭軸避震系統同LT3嘅前後反轉。

1933年，利蘭獅子型LT5A推出，佢嘅引擎室同埋散熱水箱設計唔同咗，下層車廂空間亦因而增加。佢亦可以選配柴油引擎，傳統波箱以外亦可以揀「扭力轉換器」，裝咗「扭力轉換器」嘅LT5A，車型代號係LT5Ac。LT5A嘅變種喺1934年出現，包括引擎室有預留空間改配六汽缸引擎嘅LT5B（有啲直頭係原裝配六汽缸引擎）；同埋底盤比LT5A強化少少、主要畀愛爾蘭用嘅LT6。

1935年，獅子型嘅煞車系統再經過改良，軸距17呎7吋，成為LT7/LT7c。到1937年再喺全長維持27呎半之下，將軸距稍為加長到17呎8吋半，成為LT8。1938年，利蘭再次生產引擎室有預留空間改配六汽缸引擎嘅獅子型，即係LT9/LT9c，同LT8型同時發售。

停產

第二次世界大戰爆發後，利蘭獅子型喺1940年停產。

利蘭喺1940年出過一架擁有獅子型咁輕量，但改用六汽缸引擎嘅LS1型。二戰後，戰後版利蘭Tiger取代咗原本獅子型同埋戰前版Tiger嘅位置。

睇多啲

• Ron Phillips. A History of the Leyland Bus, Crowood Press, Ramsbury 2015. ISBN 9781847978783