劉仲敬
劉仲敬（William Liu，1974年12月10號—），網名「數卷殘編」，自稱大蜀民國臨時總統，四川大學世界史碩士、武漢大學歷史系博士肄業，歷史、國際政治評論員，祖籍四川資中，喺新疆出世，而家滯留緊美國。
經歷 編輯
1996年，劉仲敬喺華西醫科大學畢業，之後喺新疆某公安局做咗差唔多十年法醫。2012年，佢喺四川大學攞到世界史碩士學位[1]。
2014年3月，劉仲敬以《民國紀事本末》作者嘅身份，喺鳳凰衛視嘅《開卷八分鐘》節目擔任來賓，就國民黨黨產同埋其他問題發表個人評論。
2015年12月，劉仲敬參加由香港浸會大學饒宗頤國學院主辦嘅「普世價值再思」論壇，並且發表演講[2]。
2017年，劉仲敬開始喺明鏡新聞網，每個星期舉行一次叫做《劉仲敬思想》嘅網絡講座。
見解 編輯
歷史評論 編輯
中日戰爭 編輯
戰爭爆發嘅真正原因，係蘇聯同日本之間嘅國際博弈；而直接原因，就係蔣介石本人唔肯承認政治現實。日本喺「滿洲」（中國東北地區）嘅投資，完全屬於正常嘅資本主義活動。投資過後，日本人又驚收唔返本，於是不斷向滿洲派遣軍隊，用來保護「南滿洲鐵道」嘅利權，最後導致咗滿洲國嘅成立。蔣介石明知南京國民政府唔夠日本打，但因為佢嘅中華民族情意結，蔣介石都係堅持發動戰爭，擔心日本控制滿洲得太耐，當地嘅民心變遷，加上國際因素，好可能永遠「攞唔返」滿洲。盧溝橋事變實際上亦係蔣介石授意沿境士兵，私底下挑釁日本關東軍而造成[3]。
時事政治 編輯
美國 編輯
據劉仲敬嘅睇法，美國係「人類有史以來最仁慈嘅秩序輸出者……如果按照當勞侵自己做生意同交稅嘅標準來衡量國際關係，就只能夠承認，美國政府係未試過『有風駛盡𢃇』」[4]。
歐洲 編輯
劉仲敬認為，「舊歐洲官僚國家模式」係冇辦法應對來自伊斯蘭國同類似組織嘅挑戰[5]。
中華人民共和國 編輯
劉仲敬認為，習近平執政路線嘅核心係「紅二代」打倒技術官僚，重新主導返政權，但如果習嘅企圖越成功，噉喺國際外交呢方面，中國就會比以前更加被動[6]。
香港 編輯
劉仲敬喺文章度講，「……獨派（註：香港獨立運動）同統派嘅任務難度天生就唔平等，打爛嘅雞蛋唔多可能自己返到蛋殼入面去。鬥爭嘅勝利對統派係唔夠嘅，對獨派係冇必要嘅。統派一定要保證，冇人會對獨統問題有興趣。只要鬥爭開始，佢哋就已經輸咗。無論鬥爭嘅結果係點，鬥爭嘅事實本身就係有利於獨派嘅」[7]。
臺灣 編輯
國民黨從整體來講「就係一班攞錯劇本嘅演員」，蔣介石作為呢批人嘅領袖，成日唔知道自己真正嘅歷史地位，過度執著「世界四強」呢個稱號，唔關注地方性事務，結果「畀咗台灣社會發展下一代精英嘅機會」[8]。
至於民進黨，劉仲敬就話臺灣喺「2015-2016年之間嘅政治生態調整，已經畀咗小英總統一個難得嘅機會」，所以劉仲敬建議蔡英文「將自己嘅任期變成新節點，穩定之後幾十年嘅格局」，以免夜長夢多。喺呢個前提下，民進黨或者轉型做「審慎型綠色大黨」，同台聯或者其他細黨就「吸收第三勢力、民間團體，形成理想型綠色大黨」，或者「扮演以色列建國初期嘅工黨角色，周圍係大批冇能力單獨執政嘅細黨」[9]。
外界評價 編輯
中華人民共和國 編輯
華東師範大學教授許紀霖話，「（劉仲敬）呢位啱啱而立之年嘅學子係一位難得嘅怪才、學痴……大識大見打通古今中西，乃當今學界罕見之天才也」[10]。
自由評論人李爾克認為，劉仲敬「毅力驚人」，「閱讀量、記憶力同驚人嘅聯想力似乎都冇得彈」，但劉嘅見解「事實錯誤」、「思想貧乏」，只不過喺度兜售緊佢「嗰套糅合（偽）西方中心主義、（偽）英格蘭保守主義、（偽）史賓格勒式嘅文明季候論、（偽）世界新秩序、（偽）春秋公羊學等『歷史理路』同『草蛇灰線』嘅一種所謂返到以德性做支撐嘅『細共同體』嘅政治哲學」[11]。而劉仲敬引起嘅所謂爭議，其實並「冇進入到專業史學研究入面具體歷史問題論爭嘅視野，本質上係一種政治姿態」，佢之所以爆紅，係由於「主要嘅爭論者喺立場同方法上都顯得粗糙，而真正有思想深度嘅學者，又因為種種原因，唔能夠充分表達自己嘅觀點」[12]。
中國藝術研究院研究員張耀傑就話，劉仲敬「係有兩篇考據性文章紮實嚴謹，畀咗佢好印象」，可惜劉嘅專著（民國紀事本末）就「……唔肯喺考據發掘方面付出最低限度嘅硬功夫，而只係投機取巧噉，將郭廷以等前輩史家已經用白話文介紹清楚嘅歷史梗概，轉用半文半白、詞不達意嘅文言文抄述一次，然後又加埋啲中國傳統嘅易經、推背圖式嘅猜謎算命嘢落去，『此亦一是非，彼亦一是非』啲噉嘅空口大話來嚇窒人，出奇制勝」[13]。
出身於北京大學中文系嘅中國詩人余世存，喺鳳凰網嘅個人訪問提到劉仲敬話：「不單只王怡，李英強，就連劉仲敬都信埋基督教，而且佢仲走咗路去美國。劉仲敬喺班後生嘅知識分子入面，係有好大嘅知識魅力。但係佢嘅生活方式同行為方式，證明呢啲人並冇搵到安身立命嘅嘢……而且喺認可呢種生活方式嘅過程入面，亦要產生出創造力，呢樣先係最緊要嘅」[14]。
北京師範大學講師田方萌認為，劉仲敬嘅《安·蘭德傳》有「抄襲其他著作」嘅重大嫌疑[15]。
海外 編輯
政治評論人梁京認為，劉仲敬以「全球視野同埋雄辯嘅歷史分析，顛覆性噉批判咗，維護大一統嘅史觀」[16]，「有好多精彩嘅高論，展示咗佢嘅才華，難得嘅學術誠實同勇氣」，但劉嘅史論同史觀「係同李登輝嘅『中國七嚿論』一樣，都有誤導中國人嘅危險」，劉「低估咗大一統文化基因嘅生命力」，而且佢亦唔能夠接受到劉嘅「宿命論傾向」[17]。只不過，「如果劉仲敬噉樣嘅誠實學者可以繼續得到容忍，甚至係鼓勵，反而會增加咗希望，透過重新發現歷史，中國人將會獲得創造未來嘅想象力」[18]。
香港財經評論員周顯認為，劉仲敬係佢「近年最佩服嘅民間歷史學家」，「好多人對於劉仲敬嘅大膽史觀，唔敢苟同，認為當中有唔少錯誤，但……一個有咁多新見解嘅人，（啲見解如果）有三成係啱嘅，噉就已經好巴閉了」[19]。
評論人金戴倫（Dylan Levi King）話劉仲敬嘅諗法係「最有生命力嘅（政治）狂想」（Most Active Fanatic）[20]。
個人著作 編輯
翻譯 編輯
- 《飛蛇與龍》，R·A·寶萊著，光明日報出版社，2010年
- 《死亡的化學反應》，西蒙·貝克特著，江蘇人民出版社，2011年
- 《星童頭骨之謎》，勞埃德·派伊著，江蘇人民出版社，2012年
- 《英國史1-6》，大衛·休謨著，吉林出版集團有限責任公司，2012年
- 《燕子號與亞馬遜號9：偵探六人組》，亞瑟·蘭森著，貴州人民出版社，2013年
- 《燕子號與亞馬遜號12：保衛白嘴潛鳥》，亞瑟·蘭森著，貴州人民出版社，2013年
- 《麥考萊英國史1-3》，湯瑪士·麥考萊著，吉林出版集團有限責任公司，2014年
- 《美法革命比較》，腓特烈·根茨著，上海社會科學院出版社，2014年
- 《大世界 小小人》（合譯），傑拉特·藍士南、法蘭西斯·福山、卡羅林·高利特著，廣西師範大學出版社，2014年
- 《陽光的療愈力》，李察·哈代著，海南出版社，2014年
- 《山精靈普克》，魯德亞德·吉卜林著，廣西師範大學出版社，2015年
- 《原來如此的故事》，魯德亞德·吉卜林著，廣西師範大學出版社，2015年
- 《理想之書：尤其是有關日本藝術的理想》，岡倉天心著，四川文藝出版社，2017年
原著 編輯
- 《民國紀事本末：1911-1949》，廣西師範大學出版社，2013年
- 《從華夏到中國》，廣西師範大學出版社，2014年
- 《安·蘭德傳：生平與思想》，商務印書館，2015年
- 《經與史：華夏世界的歷史建構》，廣西師範大學出版社，2015年
- （正體中文版：八旗文化，2018年）
- 《守先待後：思想、格局與傳統》，廣西師範大學出版社，2015年
- 《近代史的墮落·晚清北洋卷：劉仲敬點評近現代人物》，八旗文化，2016年
- 《近代史的墮落·國共卷：劉仲敬點評近現代人物》，八旗文化，2016年
- 《遠東的線索：西方秩序的輸入與中國的演變》，八旗文化，2017年
- 《中國窪地：一部內亞主導東亞的簡史》，八旗文化，2017年
- 《近代史的墮落·民國文人卷：劉仲敬點評近現代人物》，八旗文化，2018年
- 《滿洲國：從高句麗、遼金、清帝國到20世紀，一部歷史和民族發明》，八旗文化，2019年
攷 編輯
- ↑ 講者簡歷，<自由主義與殖民主義在遠東的崩潰>，香港中文大學傳訊及公共關係處[失咗效嘅鏈]
- ↑ 〈文匯報：兩地學者暢談中國模式與文明共融，2015年12月12號〉. 原著喺2018年9月4號歸檔. 喺2017年3月23號搵到.
- ↑ 劉仲敬：《遠東的線索：西方秩序的輸入與中國的演變》
- ↑ 劉仲敬：<川普能給台灣什麼想像？>，自由評論網，2016年11月11號
- ↑ 劉仲敬：<舊歐洲官僚國家模式，將無法應對伊斯蘭國？>，端傳媒，2015年11月15號
- ↑ 劉仲敬：<夜幕降臨>，自由評論網，2016年7月25號
- ↑ 劉仲敬：<香港民族的林中路>，自由時報，2016年8月31號
- ↑ 中時電子報：<回顧國共近代史 蔣錯估兩岸情勢 陸學者指尷尬現況源於歷史>，2016年11月19號
- ↑ 劉仲敬：<如果我是小英總統>，自由時報，2016年4月26號
- ↑ 〈<不確定的歷史？——一本奇書引發的爭議>，新京報，2013年11月16號〉. 原著喺2021年8月2號歸檔. 喺2017年10月27號搵到.
- ↑ 〈李爾克：<有一種「先知」讓人如何評判？>，南方都市報，2015年11月15號〉. 原著喺2017年9月10號歸檔. 喺2017年3月23號搵到.
- ↑ 〈李爾克：<劉仲敬的三個面相>，南方都市報，2016年1月11號〉. 原著喺2018年9月13號歸檔. 喺2017年3月23號搵到.
- ↑ 張耀傑：<劉仲敬的硬傷與浮誇>，《粵海風》，2015年06期
- ↑ 余世存：<知行不一的讀書人頂多算文化掮客>，鳳凰網
- ↑ 田方萌：<劉仲敬《安·蘭德傳》抽檢報告>，《南方週末》，2017年6月29號
- ↑ 梁京：<重整河山待後生>，自由亞洲電台，2014年6月3號
- ↑ 梁京：<中國改革僵局難破的原因>，自由亞洲電台，2016年3月29號
- ↑ 〈梁京：<發現歷史與創造未來>，自由亞洲電台，2014年8月19號〉. 原著喺2018年9月5號歸檔. 喺2017年3月23號搵到.
- ↑ 周顯：<炒股理由都是吹出來>，明報財經網，2016年11月17號
- ↑ "Dylan Levi King：China's Intellectual Dark Web And Its Most Active Fanatic，supchina.com，2019年3月13號". 原著喺2019年3月15號歸檔. 喺2019年3月15號搵到.